Agrikultura Oekusi propoin millaun $1-resin iha OJE 2027 atu harii irrigasaun
OEKUSI, 17 Setembru 2026 (TATOLI) – Diresaun Servisu Rejionál Agrikultura Rejiaun Administrativa Espesiál Oekusi Ambeno (RAEOA), propoin millaun $1-resin iha proposta Orsamentu Jerál Estadu (OJE) 2027 nian atu konstrui irrigasaun atu fasilita ba natar sira Noa-ana suku Lela-Ufe sub-rejiaun Nítibe no natar sira iha Bitopa suku Usitasa’e sub-rejiaun Oésilo atu kuda núu hibrida.
Prezidente Autoridade RAEOA, Régio da Cruz Salu, esplika katak, fundu ne’e nu’udar integrasaun boot kona-ba dezenvolvimentu ekonomia azul no verde, tanba nia operasionalidade koordena direita husi Diresaun Rejionál Seguransa Alimentár no Agrikultura ba asuntu dezenvolvimentu sentra ekonomia iha kada suku ou kada zona potensiál sira iha Oekusi.
“Fundu ne’e atu finansia no fasilita inisiátiva sira-ne’ebé orientadu ba empreendedorizmu no ekonomia merkadu ho eskala, bele liuhusi kooperativa no pre-kooperativa sira, setór privadu inklui komunidade rasik,” nia hateten hafoin hala’o enkontru koordenasaun ho funsionáriu Agrikultura Oekusi, ohin.
Notísia relevante:OJE 2027, RAEOA propoin millaun $50 prioriza setór ‘xave estratéjiku’ sira
Autoridade ne’e fó ezemplu, hanesan iha tinan ne’e, Autoridade RAEOA ofisializa ona Programa Movimentu Empreendedorizmu, nu’udar meiu atu organiza povu hodi dezenvolve poténsia ekonomia verde no azúl iha kada suku no aldeia.
“Ne’ebé, ohin ita enkontru ho sira, nune’e atu define no haree programa prioridade sira iha tinan oin mai,” nia hateten.
Notísia relevante:Prezidente RAEOA konsolida natar-na’in Hau-Ana atu kuda nuu hibrida ektare 50 iha Bitopa
Diretór Diresaun Servisu Rejionál Agrikultura Oekusi, José Oqui, hateten fundu millaun $1-resin ne’e aloka iha Kapitál Dezenvolvimentu prioridade liu ba konstrusaun irigasaun iha Oésilo no Nítibe.
“Kona-ba Kapitál Dezenvolvimentu millaun $1-resin ne’e, tau prioridade liu ba irigasaun sira atu konstrui iha liña fronteira, hanesan iha Noa-Ana suku Lela-Ufe, Oésilo iha Bitopa tanba natar balu abandona no durante ne’e mós ita halo ona reabilitasaun no konstrusaun iha iha área urbana sira, maibé sei halo perfurasaun bee-moos atu fornese ba natar sira hanesan tinan kotuk iha halo ona iha suku Lalisuk,” nia hateten.
Ezekutivu ne’e énfaze kataktékniku sira husi servisu agrikultura rejionál Oekusi, halo ona levantamentu dadus iha terrenu, hodi prepara dezeñu BoQ.
Notísia relevante:Autoridade RAEOA aloka rihun $105-resin harii irrigasaun rua iha suku Lalisuk
Jornalista : Abílio Elo Nini
Editór : Rafael Ximenes de A. Belo
