Fraternidade Umana hanorin ita harii domin iha família no sosiedade – Administradór TTU
OEKUSI, 25 Setembru 2026 (TATOLI) – Administradór Distritu Timor Tengah Utara (TTU) Repúblika Indonézia, Yosep Falentinus Delasalle Kebo, sesta ne’e partisipa iha diálogu aberta kona-ba implementasaun Fraternidade Umana iha Timor-Leste, ne’ebé realiza iha Rejiaun Administrativa Espesiál Oekusi Ambeno (RAEOA), liuhusi kooperasaun Prezidente Repúblika (PR), Gabinete Fraternidade Umana, servisu hamutuk ho Ajénsia Noticioza Timor-Leste, Institutu Públiku (TATOLI,I.P) no Autoridade RAEOA.
Perante Diálogu ne’e, Autoridade Timor Tengah Uatara ne’e, indikadu nu’udar oradór prinsipál, hodi ko’alia fokuliu ba atividade sosiál sira iha liña fronteira relasaun ho valór Fraternidade Umana nian, ba komunidade rai rua nian.
“Ko’alia kona-ba Fraternidade, iha de’it konseitu ida katak, haree hosi perspetiva igreja nian, Fraternidade ne’ebé bazeia ba domin no dame, atu nune’e bainhira ita harii relasaun ida-ne’ebé di’ak, buat ne’ebé ita tau prioridade maka, oinsá harii domin, hadomi ita-nia maluk (Mamnaun), hadomi ita-nia maun-alin sira (Nekaf-mese má Ansaof mese), entre fronteira rua ne’e lahó barreira séria, Oekusi no TTU ida de’it, tanba de’it administrasaun ita tenke obedese atu tama-sai ita tenke hato’o (lapor), maibé, tuir loloos, ita ne’e ida de’it, la seluk la leet, tansá, lian ida de’it maka baiqueno, kultura mós ida de’it,” nia hateten iha nia intervensaun nu’udar oradór, ne’ebé hala’o iha salaun konvensaun Palaban, sesta ne’e.
Notísia relevante:Prezidente RAEOA apresia TATOLI,I.P deside Oekusi ba diálogu Fraternidade Umana
Dalaruma polítika haketak malu, loloos ne’e la permite ona, sé iha Indonézia ohin loron, fila fali hare fali ba kotuk ba jornada polítika eleisaun direta, povu direitamente mak hili sira-nia lideransa entaun ne’e estraga vizaun balun husi vida sosiál nian, (halo aat povu sira-nia hanoin) se bele parlamentu mak hili lideransa sira atu nune’e labele estraga tan sosiedade sira.
Tanba, nia dehan, dalaruma bele maun-alin istóri malu no la hasoru malu tanba de’it diferénsia partidu polítika, ida-ne’e mak problema, iha TTU nestemumentu la aplika ona, katat labele, bainhira sai lideransa ba povu tomak, la’ós ba bandeira ida de’it.
“Ita nu’udar maluk, maun-alin iha rejiaun rua ne’ebé viziñu hela, tenke apoia ba malu, labele husik ida-ne’e akontese bai ta-nia povu,” nia hateten.
Notísia relevante:Diálogu Fraternidade Umana iha Oekusi, Nuno Horta; vizaun umanidade hametin unidade nasionál kultura dame
Nia informa, bainhira sidadaun ida hetan mandatu husi komunidade atu lidera rai ne’e, tenke husik nível no identidade hotu, katak, povu mak hili, no desizaun hotu tenke tuir povu nia hakarak, atu hadi’a povu nia moris la’ós hadi’a moris rasik ho família.
“Ida-ne’e salah satu contoh (ne’e ezemplu ida) reál kona-ba Fraternidade Umana, oinsá hadomi malu, ohin ita hamutuk iha ne’e, atu ko’ali ba malu, kona-ba domin, tanba ita ne’e fronteira mak fahe ita, maibé ita-nia lisan, kultura hanesan Atoin Meto (Atoni),” nia hateten.
Tanba ne’e, Autoridade TTU ne’e, prontu sei apoia polítika saida de’it mak Autoridade no povu Oekusi atu deside liliu polítika ekonómia fronteira nian, nune’e bele hatudu progresu ba rejiaun rua ne’e.
“Ami apoiu duni, liafuan ida dehan nune’e, kuandu ita atu ba oin, la’ós ema mak mai haree ita, maibé ita-nia an mak tenke halo ita-nia rai ne’e oin, mai ita servisu hamutuk hodi dezenvolve ita-nia rejiaun ne’e ho fuan ne’ebé moos no ita la’o hamutuk ba oin,” nia katak.
Notísia relevante:Tinan ne’e, hahú implementa Disiplina Fraternidade Umana iha ensinu báziku
Diálogu Fraternidade Umana
Atividade Diálogu Fraternidade Umana nu’udar inisiativa ida husi TATOLI,I.P, ne’ebé hala’o ho objetivu atu hametin konfiansa entre povu no Estadu, promove pás, diplomásia no defende direitu ema hotu, inklui solidariedade, toleránsia, no unidade iha diversidade.
Rezultadu esperadu (Outcomes) husi atividade ne’e mak:
- Hametin relasaun Estadu ho povu. Fó espasu atu kria konfiansa, fraternidade umana. solidariedade, no
- Valoriza diversidade kulturál no sosiál RAEOA. Programa ne’e fó espasu atu fó apresiasaun ba kultura no identidade komunidade hanesan parte esensiál ba unidade nasionál
Jornalista: Abílio Elo Nini
Editór: Rafael Ximenes de A. Belo
