Estudante ESJF Fatumea apresia TLPU fahe informasaun kona-ba papél jornalizmu-literasia Dijitál
KOVALIMA, 07 Outubru 2026 (TATOLI) – Alunu sira iha Eskola Sekundária Jerál Filiál (ESJF) Fatumea, Munisípiu Kovalima, apresia no kontente rona informasaun kona-ba literasia dijitál ne’ebé fahe husi estrutura Asosiasaun Jornalista Timor-Leste Press Union (TLPU).
Alunu ESJF Fatumea, Maria Novita da Costa, hateten katak informasaun kona-ba uza média sosiál ho responsabilidade importante tebes ba alunu sira liuliu iha prosesu aprendizajen no hasa’e koñesimentu.
“Ami presiza duni rona informasaun kona-ba oinsá atu uza média sosiál ho loloos no di’ak, tanba iha benefísiu ba ami atu hasa’e koñesimentu no uza média sosiál, hanesan Facebook no WhatsApp no tiktok ho responsabilidade”, Maria Novita da Costa hateten hafoin rona informasaun kona-ba literasia dijitál ne’ebé Prezidente TLPU, Cândido Alves, fahe ba alunu sira.
Notisia relevante: Expedito: Governu respeita independénsia mídia no liberdade jornalista
Iha fatin hanesan, Estudante Januário da Costa, hatete média dijitál bele ajuda alunu sira iha prosesu aprendizajen, liuliu bainhira sira hasoru difikuldade no la komprende matéria ne’ebé profesór sira hanorin.
“Ami presiza duni rona informasaun kona-ba uza média dijitál ho loloos. Durante ne’e ami uza Facebook atu buka no aprende matéria balun ne’ebé ami seidauk komprende. Liu husi Facebook ami bele hetan informasaun ne’ebé ajuda ami estuda”, nia dehan.
Enkuantu, Profesór no Konselleru Konsellu Estudantil ESJF Fatumea, Geraldo Orlens, agradese ba estrutura TLPU tanba atividade literasia dijitál ne’e parte ida husi programa estrakurikulár ne’ebé eskola hala’o ba alunu sira.
Nune’e, nia konsidera atividade ne’e importante atu orienta alunu sira kona-ba oinsá uza média sosiál ho di’ak no evita informasaun ne’ebé la tuir realidade.
Utiliza media sosial ho disiplina
Prezidente TLPU, Cândido Alves, esplika katak jornalista nia papel mak fahe informasaun ne’ebé edukativu, fatuál no bele fó benefísiu ba públiku .
Nia husu alunu sira atu uza média sosiál ho responsabilidade, tanba uza média sosiál la’ós de’it atu hetan informasaun, maibé tenke konsidera mos impaktu ba ema seluk.
“Alunu sira bele uza média sosiál, maibé ne’e responsabilidade individual. Jornalista sira ne’ebé fahe informasaun iha responsabilidade institusionál. Tanba ne’e, ita-boot sira bainhira uza média sosiál tenke ho loloos no responsabilidade, no labele hakanek ema seluk”, katak Cândido Alves dehan.
Notisia relevante: TLPU apoia nesesidade bázika ba oan-kiak na’in ualu iha suku Nanu
Jornalista:CelestinaTeles
Editór: Florencio Miranda Ximenes
