FFTL lansa konstrusaun kampu futsál iha Vikeke
VIKEKE, 12 Outubru 2026 (TATOLI)–Federasaun Futeból Timor-Leste (FFTL) hamutuk ho Prezidente Autoridade Munisípiu Vikeke, Segunda ne’e, lansa fatuk-inan ba konstrusaun kampu futsál iha Aldeia Mamulak, Suku Karaubalu, Postu Administrativu Vikeke Vila, ho orsamentu US$90.165,96.
Prezidente FFTL, Nilton Gusmão, hateten katak konstrusaun kampu futsál ne’e atu fasilita joven sira atu pratika desportu no dezenvolve talentu futsál iha munisípiu ne’e.
“Ohin ita hamutuk atu fó-sasin ba lansamentu fatuk-inan ba kampu futsál iha Munisípiu Vikeke. Kampu ne’e sei bele uza durante loron no kalan tanba sei instala mós sistema iluminasaun, nune’e fasilita joven sira atu pratika futsál,” Nilton Gusmão hateten iha serimónia lansamentu.
Nia esplika katak FFTL trasa planu projetu konstrusaun kampu futsál Vikeke iha kedas tinan 2025, no aprezenta proposta ba Konfederasaun Futeból Ázia (AFC-sigla ingleza) hodi hetan aprovasaun ba implementasaun projetu ne’e.
Nilton husu Asosiasaun Futeból Vikeke (AFV) no empreza responsável ba konstrusaun atu kolabora di’ak, garante kualidade obra no remata konstrusaun tuir prazu kontratu.
Nia mós husu AFV atu hafoin konstrusaun ramata, organiza kompetisaun futsál ba joven sira no asegura katak kampu ne’e uza ho kuidadu atubele fó benefísiu ba komunidade durante tempu naruk.
Iha fatin hanesan, Prezidente Autoridade Munisípiu Vikeke, Francisco Cruz Simões de Gonzaga Soares, hato’o agradesimentu ba FFTL tanba hahú ona konstrusaun kampu futsál iha munisípiu ne’e.
Nia afirma katak autoridade munisípiu prontu atu kolabora ho FFTL hodi dezenvolve futsál no fó oportunidade ba joven sira atu dezenvolve sira-nia kapasidade no prepara an atu partisipa iha kompetisaun nivel nasionál.
Iha parte seluk, Reprezentante Empreza Joni Unipessoal Lda., Joanico Amaral, garante katak empreza sei hala’o obra tuir kontratu no asegura kualidade konstrusaun.
“Ami sei hahú konstrusaun husi aban bá-oin, ho prazu kontratu fulan haat. Ami sei halo esforsu atu finaliza obra tuir prazu ne’ebé determinadu. Obra ne’e inklui kampu futsál, edifísiu, tribun no rede hale’u kampu,” Joanico Amaral subliña.
Projetu ne’e inklui konstrusaun kampu ho medida metru 38 x 42, edifísiu, sistema iluminasaun, tribun no rede hale’u kampu, ho orsamentu totál US$90.165,96 no prazu konstrusaun fulan haat.
Serimónia lansamentu ne’e hetan partisipasaun husi Vise-Prezidente FFTL, Falur Rate Laek, reprezentante autoridade lokál, Komandante PNTL Munisípiu Vikeke, Prezidente AFV no joven sira.
Kontekstu
Antes ne’e, TATOLI relata katak komunidade Aldeia Mamulak, Suku Karaubalu, oferese rai gratuita ba Asosiasaun Futeból Vikeke atu konstrui kampu futsál multifunsaun. Sekretáriu-Jerál AFV, Rosito Soares do Rosário, esplika katak kampu ne’e sei ajuda asosiasaun organiza kompetisaun no promove talentu desportivu joven sira, tanba komunidade seidauk iha kampu futsál adekuadu. Lee informasaun kompleta iha: Komunidade Karaubalu oferese rai ba AFV konstrui kampu futsál.
Iha Fevereiru 2026, Prezidente FFTL, Nilton Gusmão, mós reafirma kompromisu federasaun atu dezenvolve futeból nasionál liuhosi kooperasaun ho FIFA, AFC no AFF, inklui dezenvolvimentu infraestrutura desportiva no oportunidade ba joven sira. Lee notísia iha: Nilton Gusmão kompromete sei eleva prestasaun futeból Timor-Leste.
Jornalista: Vitorino Lopes da Costa
Editór: Xisto Freitas da Piedade
