Komunidade Karaubalu oferese rai ba AFV konstrui kampu futsál

VIKEKE,  08 Outubru  2026 (TATOLI)—Sekretáriu Jerál Asosiasaun Futeból Vikeke (AFV), Rosito Soares do Rosário, hateten abitante sira husi Aldeia Mamulak, Suku Karaubalu, Postu Vikeke Vila, Munisípiu Vikeke, oferese rai gratuita ba AFV hodi konstrui kampu  futsál multifunsaun.

“Kona-ba konstrusaun kampu futsál, ita iha ona rai ne’ebé uluk oferese husi ita-nia komunidade Mamulak liuhusi Tera Proriedade Munisípiu Vikeke, atu konstrui kampu futsál multifunsaun ida-ne’ebé ho medida tuir padraun kampu futsál 38mx42m-resin,” Rosito Soares ba TATOLI, iha Postu Vikeke Vila, Kinta ne’e.

Rosito esplika rai ne’ebé komunidade Karaubalu oferese ba konstrusaun kampu futsál ne’e  Federasaun Futeból Timor-Leste (FFTL) tau ona ba planu prioridade hodi konstrui kampu futsál multifusaun ida ba Munisípiu Vikeke.

“Konstrusaun kampu futsál ne’e sei kompleta ho tribun no edifísiu hotu. Orsamentu ba konstrusaun ne’e mai husi FIFA, AFC no FFTL, maibé montante orsamentu  mak ladún hatene tanba FFTL mak jere,” nia tenik.

Nia hatutan prosesu konstrusaun ba kampu futsál referidu sei lansa iha fulan-Outubru 2026, sei lansa direta husi  FFTL, FIFA no AFC.

“Ha’u sente estabelesimentu kampu futsál multifunsaun ida-ne’e bele ajuda ona ami asosiasaun hodi realiza jogu ba joven sira, tanba durante ne’e ita laiha kampu futsál ba joven sira hodi promove talentu desportivu,” nia hato’o.

Iha fatin ketak, Xefe Suku Karaubalu, João Pinto, haktuir komunidade oferese rai ba AFV hodi konstrui kampu ba joven sira tanba durante ne’e laiha kampu futsál ba joven sira.

“Ita durante ne’e laiha kampu futsál. Entaun, rai ida-ne’ebé ita-nia komunidade oferese ba AFV ne’e mak ita atu iha kampu futsál,” nia hateten.

Jornalista: Vitorino Lopes da Costa

Editór: Xisto Freitas da Piedade