Suspende letiva, Edukasaun Oekusi enkoraja inan-aman akompaña oan-sira estudu iha uma
OEKUSI, 15 Outubru 2026 (TATOLI) – Diretór Servisu Rejionál Edukasaun iha Rejiaun Administrativa Espesiál Oekusi Ambeno (RAEOA), Vincêncio Cono, apela ba inan-aman atu kontinua akompaña oan sira estudu iha uma, no evita atividade fízika perante períodu suspensaun atividade letiva durante loron tolu.
Dirijente Edukasaun ne’e afirma, desizaun ne’e fó sai, bazeia orientasaun husi komunikadu imprensa ne’ebé fó sai husi Ministériu Edukasaun (ME) liuhusi Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, hamutuk Ministériu Administrasaun Estatál (MAE), hodi suspende temporariamente atividade letiva prezensiál durante loron tolu, hahú ohin loron 15 to’o 17 Outubru 2026, hodi proteje saúde estudante, manorin no komunidade edukativa sira husi risku poluísaun ár.
“Medida suspensaun temporáriu ne’e abranje eskola sira hotu iha nivél hothotu iha territóriu RAEOA nian, hodi responde ba sirkunstánsia no orientasaun husi Governu Sentrál, tan ne’e husu inan-aman tau matan ba oan sira, estuda de’it iha uma, labele aproveita sira hodi halo servisu todan durante feriadu loron tolu ne’e,” refere iha komunikadu imprensa ne’ebé Ajénsia TATOLI,I.P asesu, ohin.
Notísia relevante:Tránzitu alerta ba inan-aman atu labele autoriza oan minoridade utiliza motór elétriku
Ita nota komunikadu imprensa ne’e, Diretór Edukasuan Vincêncio Cono husu autoridade eskola sira, profesór, no inan-aman hotu atu kumpre no apoia orientasaun ne’e, hodi garante seguransa no ordén iha ambiente edukasaun nian.
“Parte edukasaun mós husu ba estudante sira atu kontinua aproveita tempu iha uma hodi estuda ho responsabilidade no labele lakon motivasaun atu aprende durante tempu suspensaun ne’e,” nia fó hanoin.
Iha parte ikus, Diresaun Servisu Rejionál Edukasaun Oekusi, sei kontinua fó sai informasaun tuirmai, kona-ba re-abertura atividade letiva prezensiál bainhira situasaun no orientasaun foun husi Ministériu Ministériu Edukasaun no Ministériu Administrasaun Estatál.
Notísia relevante:Ahi-suar husi Indonézia, ME alerta ba estudante sira uza máskara
Rekorde fali katak, iha loron kuarta-feira, 14 Outubru 2026 horsehik, Governu Timor-Leste liuhusi Ministériu Edukasaun (ME) no Ministériu Administrasaun Estatál (ΜΑΕ), suspende temporariamente atividade letiva prezensiál durante loron tolu, husi 15 to’o 17 Outubru 2026, atu proteje saúde estudante, manorin no komunidade edukativa husi risku poluisaun ár.
Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Domingos Lopes Lemos, hateten katak medida ne’e aplika ba estabelesimentu ensinu públiku, partikulár no kooperativa sira-neʼebé integra iha rede servisu públiku ensinu nian, husi nivel pre-eskolár to’o ensinu sekundáriu jerál no tékniku-vokasionál.
Nia esplika katak desizaun ne’e bazeia ba informasaun husi Diresaun Nasionál Meteorolojia no Jeofízika (DNMG-sigla ingleza) kona-ba deteriorasaun kualidade ár iha Timor-Leste, ne’ebé kontaminadu ho partíkula poluente sira-neʼebé mai husi ahi-su’ar iha rejiaun ka nasaun viziña.
Notísia relevante:DNMG alerta kondisaun ár sei grave liután bá 70%-80% iha Sesta-feira
Jornalista: Abílio Elo Nini
Editór: Rafael Ximenes de A. Belo
