CCLN Oekusi: “Ha’u triste tebes”
OEKUSI, 21 Outubru 2026 (TATOLI) – Prezidente Konsellu Kombatente Libertasaun Nasionál (CCLN) iha Rejiaun Administrativa Espesiál Oekusi Ambeno (RAEOA), António da Conçeição, lamenta no triste, tanba iha komemorasaun loron Masakre Maquelab ba dala 27 iha suku Taiboko, komunidade no veteranu sira ladun partisipa.
Notísia relevante:Memória 20 Outubru 1999, milísia tiru mate Oekusi-oan na’in-hitu iha Taiboko
António da Conçeição, hato’o nia lamentasaun ne’e, iha diskursu ofisiál selebrasaun loron Masakre Maquelab, ne’ebé hala’o iha loron 20 Outubru 2027 ne’e.
“Veteranu sira ohin ita haree, laiha partisipasaun. Ha’u triste tebes. Iha suku Taiboko veteranu barak tebes kuaze na’in-40, maibé ohin laiha ema ida atu partisipa, husi Bokos, Kabukpele, Maquelab rasik, ha’u husu labele sai veteranu ba BNCTL, BNU kada fulan ba simu osan Estadu, martír sira-ne’e mate maka ohin ita goza, maibé jiwa (espiritu) nasionalizmu, patriotizmu laiha, konsellu sei haree asuntu ne’e ho sériu,” nia hateten iha selebrasaun loron Masakre Maquelab iha suku Taiboko, tersa ne’e.
Tanba saida mak la iha partisipasaun?
Nia hateten, tuir loloos veteranu mak hamriik iha oin, no hatudu ezemplu ba komunidade liliu joven sira, maibé iha komemorasaun loron Masakre Maquelab, veteranu barak iha suku Taiboko, laiha partisipasaun, komesa husi preparasaun.
“Sira-nia mate maka ohin simu osan veteranu ne’e, sira-nia mate mak ohin simu osan idozu no pensaun sira seluk, maibé tanba saida mak komunidade laiha partisipasaun másima? Triste tebes, ha’u hakarak hateten iha ne’e katak, Konsellu Veteranu sei investiga asuntu ne’e ba veteranu sira iha suku Taiboko rasik,” nia hateten.
Nia observa, juventude no ema barak mai husi suku no sub-rejiaun sira seluk, maibé nu’udar uma-na’in, laiha konsiderasaun ba loron istóriku ba luta libertasaun ne’ebé akontese iha povu Taiboko nia leet. Tanba espera ba komemorasaun 2027 labele akontese.
“Ita tebki hakruuk ba sira-nia mate, ohin ha’u husu komisaun organizadora, dehan laiha kontribuisaun ruma husi veteranu sira, loloos kada tinan, veteranu hamutuk ho joven sira mak organiza,” nia fó hanoin.
Notísia relevante:‘Éroi Maquelab iha silénsiu ami bolu imi-nia naran’
Hatan ba preokupasaun ne’e, Prezidente Komisaun Organizadora Masakre Maquelab, Mateus Naz, atuál Xefe Suku Taiboko, konsiente katak, falla iha liña koordenasaun, tanba antes ne’e forma estabelsimentu komisaun, ladun partilla informasaun ba aldeia sira hotu iha suku Taiboko.
“Ha’u rekoñese ohin partisipasaun menus komunidade sira barak la mai inklui veteranu sira, ita haree maioria viziñu sira de’it mak hola parte, buat sira-ne’e akontese tanba ami ladun fahe informasaun ba aldeia sira iha mumentu forma komisaun, ne’ebé ami promete sei hadi’a iha tinan oin,” nia hateten.
Notísia relevante:Autoridade RAEOA kompromete moderniza monumentu Masakre Maquelab
Jornalista: Abílio Elo Nini
Editór: Rafael Ximenes de A. Belo
