COVALIMA, 20 fevereiru 2021 (TATOLI)- Tama ba loron lima, hahú hosi loron 16 to’o loron 20 fevereiru 2021, ekipa Vijilánsia Ministériu Saúde rekolla ona amostra liuhosi swab COVID-19 iha liña fronteira Munisípiu Covalima liu ona alvu.
Alvu ne’ebé ekipa vijilánsia saúde termina foti amostra liuhosi teste swab COVID-19 tenke rekolla ba abitante 700, maibé to’o ohin-loron, konsege rekolla ona amostra ba abitante na’in-842.
Notísia Relevante : Screening masál iha munisípiu tolu rekolla ona amostra 1356
Hosi númeru ne’e, ekipa vijilánsia saúde ne’ebé destaka iha pontu entrada Covalima nian haruka ona amostra 513 mai iha Laboratóriu Nasionál Dili hodi halo teste.
Koordenadór Ekipa Médika Sientista, António Sales, informa amostra ne’e ekipa rekolla hahú hosi liña fronteira risku ba COVID-19 hanesan Postu Tilomar, Suku Beiseuk kompostu hosi Aldeia Mota Masin, Wetaba, Nikir, Maubissi, Foho Lulik, Postu Unidade Patrolliamentu Fronteira (UPF)-Maubisse no Postu F-FDTL Lalawa.
Ekipa kontinua rekolla tan iha Suku Belulik Leten kompostu hosi Aldeia Mane Kiik, Klau Halek no Belulik Kraik ho totál amostra 329.
Ba jornalista sira, António Sales, hateten mezmu dadus ne’ebé ekipa rekolla liu ona alvu, maibé ekipa sei halo esforsu maka’as hodi kontinua foti nafatin amostra iha liña fronteira sira ne’ebé baliza ho viziñu Indonézia.
Tuir planu, domingu (21/02), ekipa sei kontinua rekolla tan amostra iha Suku Fatumea hosi Aldeia, Fatumea, ho Aldeia Mota Ulun no sei kontinua viajen ba Postu Fohorema no Suku Dato Rua.
Tuir observasaun Agência TATOLI nian iha terrenu hatudu katak komunidade sira entuziazmu no kolabora ho ekipa vijilánsia saúde hodi submete ba atividade teste swab COVID-19.
Jornalista : Eugénio Pereira
Editór : Francisco Simões
