DILI, 21 abríl 2021 (TATOLI)—Austrália oferese tan médiku na’in-haat, atu fó apoiu tékniku ba ekipa saúde hodi luta kombate surtu COVID-19 iha Timor-Leste (TL), ne’ebé númeru kazu pozitivu kontinua aumenta hosi loron ba loron.
Médiku na’in-ha’at ne’e to’o ona Aeroportu Internasionál Nicolau Lobato, Comoro, Dili ho aviaun Qantas, iha tuku 11:30 otl.
Notísia relevante:Austrália apoia materiál emerjénsia tonelada 27-resin ba TL
“Ohin médiku na’in-haat mai hosi Austrália atu serbisu hamutuk ho Ministéiru Saúde (MS) hodi fó asisténsia téknika iha Laboratóriu Nasionál Saúde,’’ Embaixadór Austrália iha TL, Pitter Robert, hateten ba jornalista-sira iha Aeroportu Comoro, kuarta ne’e.
Diplomata ne’e hateten, Austrália oferese tan médiku hirak-ne’e atu apoia TL tanba haree ba númeru kazu pozitivu COVID-19 ne’ebé aumenta kada loron.
Iha 14 abríl, Austrália oferese ona ekipa epidemiolojísta seniór ba asisténsia médika na’in-rua atu serbisu hamutuk ho ekipa vizilánsia Ministériu Saúde.
To’o horisehik, Sala Situasaun Sentru Integradu Jestaun Krize (SIJK) rejista tan kazu pozitivu foun COVID-19 hamutuk 84, ne’ebé detetadu iha Munisípiu Dili 73 no Munisípiu sira seluk 11. SIJK mós anunsia kazu rekoperadu hamutuk 32 no totál kazu ativu hamutuk 725.
Notísia relevante:COVID-19: kazu foun 84, ativu 725
Jornalista: Nelson de Sousa
Editór: Cipriano Colo
