DILI, 17 maiu 2021 (TATOLI)—Polísia Nasionál Timor-Leste (PNTL), liu hosi Serbisu Investigasaun Kriminál Nasionál (SIKN), bolu ona Sekretáriu Estadu Arte no Kultura (SEAK), Teófilo Caldas, hodi halo indentifikasaun nu’udár sasin ba kazu ninia kaben Levenita Madeira, ne’ebé hakotu-iis ho kondisaun tara an iha rezidénsia, suku Bebonuk, postu administrativu Dom Aleixo, munisípiu Dili, domingu (16/05).
Identifikasaun ba membru Governu ne’e, hahú iha edifísiu SIKN, iha domingu (16/05) tuku 10:00 to’o 16:00 otl, no ohin kontinua iha tuku 9:00 to’o 11:00 otl.
Notísia relevante:Mate-isin espoza SEAK transporta ba HNGV hodi halo autópsia
Tuir observasaun Agência Tatoli iha terrenu, membru Governu ne’e tama ba edifísiu SIKN, uza karreta Governu marka prado, xapa matríkula 00-043 G akompaña hosi Korpu Seguransa Pesoál (CSP sígla portugés) na’in-tolu.
Hafoin identifikasaun, jornalista-sira tenta konfirma ho atuál membru Governu ne’e, liga ho kazu mate tara an, maibé rezeita atu fó komentáriu.
Entretantu, PNTL eskuadra Ai-mutin, Dili, ohin dadeer mós simu karta keixa hosi família matebian, ne’ebé husu mós atu halo investigasaun kle’an ba Teófilo Caldas kona-bá motivu loloos hosi matebian tara an ne’e.
Jornalista: Eugénio Pereira
Editór: Cipriano Colo
