MEJD apoia fundu kiik ba eskola 42 iha Baucau

BAUCAU, 21 dezembru 2021 (TATOLI) – Ministériu Edukasaun, Juventude no Desportu (MEJD) liuhosi Global Patnership Education (GPE) apoia fundu kiik ho montante $34.320 ba eskola hamutuk 42 iha munisípiu Baukau.

Vise-Ministru Edukasaun, Juventude no Desportu, António Guterres, hateten, eskola hirak-ne’ebé hetan apoia refere tanba submete proposta no halo aprovasaun hosi ekipa verifikadór hafoin foti dadus direita iha baze.

“Ohin, ita iha eskola 42 benefisiáriu ba fundu bee-moos nian, apoiu ida-ne’e mai hosi parseiru GPE ba bee-moos de’it,” António Guterres ko’alia iha Vila Nova, tersa ne’e.

Antes ne’e, faze dahuluk Baucau rasik implementa projetu hamutuk 16 hosi fundu refere, tanba konsidera sussesu nune’e GPE kanaliza bee-moos hamutuk 42 ba eskola ensiñu bázika sentrál no filiál.

“Apela ba benefisiáriu sira uza fundu ne’e ho di’ak atu iha efisiénsia no efikásia, uza didi’ak osan ne’e uza tuir-nia tempu,” António akresenta.

Diretór Servisu Edukasaun Munisípiu Baucau, Augusto Hornai Ximenes, hateten, iha tinan-2021 simu tán fundu hosi GPE, nune’e husu diretiva eskola ensinu bázika sira atu asesu bele halo proposta liuhosi servisu edukasaun munisípiu submete ba nasionál.

“Eskola sira-ne’e mai hosi postu administrativu-lima nia foku de’it ba iha pre-eskolár no ensinu báziku, maioria Baucau vila hamutuk 11, Baguia 11, kelikai lima inklui venilale,” Augusto hateten.

Prosesu implementasaun sei kanalia bee-mos hosi bee-matan ba eskola ho distánsia kilómetru ida ho valór orsamentu ba kada eskola ne’ebé mak sai benefisiáriu hetan menus hosi $1.000.

Totál orsamentu ne’ebé aloka ba eskola hirak-ne’e hodi kanaliza bee-moos hamutuk $34.320 ho durasaun fulan-tolu.

Entretantu, eskola ne’ebé mak sai benefisiáriu mak hanesan, EBF Uaitame, Kilikai, EBC Tirilolo, EBF Rufaguia Baguia, EBF Afalari, EBF Aelita Baguia, EBF Betumuto Uacala, EBF 1.2 Lebenei, EBC 1.2.3 Buaua Lavateri, Baguia, EBF Haudere, EFB Larisula, EBC 1.2.3 Ossohuna, Baguia.

EBF Katólika Defauasi, EBC 1.2.3 João de Brito Lavateri, EBF Badomori, EFB Uailaco, EBF Koni Matebian, EFB Uaikulu, EBF São João Bosco Samalari, EBF Kairavela, EBF Ossoala, EBF Tasi Vemase Vila, EBF Katólika Atelari, EBF Katólika Auraba, EBF Samaguia, EBC Soba Laga, EBF Lekiraka Bu’u, EBF Latua.

Nune’e mós EBF 20 de Augusto Ossoluga, EBF Vila Nova, EBC Vila Nova, EPE/EBF Komadante Maubuti, EBC Aubaka, EBC Bukoli, EBF Buruma, EBF Lutumuto, EBF Katólika Santo António Uatu-ua, EFB, EBC Gariuai, EBF Selegua Sagadate, EPE Lui-lubu, EBC Binagari, EBF Katolika Saelari no EBF Katolika Laisorulai.

Jornalista         : Natalino Belo

Editór               : Evaristo Soares Martins