DILI, 11 fevereiru 2022 (TATOLI)—Organizasaun Populár Mulher Timor (OPMT), hosi partidu Frente Revolsionáriu Independente (FRETILIN)sexta ne’e realiza konferénsia nasionál ba dala-IV ho tema “OPMT reziliente! Hori uluk, ohin loron no aban bainrua” hodi diskute kona-ba programa ba tinan lima no diskute Estutu hodi hili estrutura foun.
Iha abertura, Sekretáriu Jerál Partidu Fretilin, Mari Alkatiri, hateten konferénsia ida-ne’e momentu importante tebes hodi diskute kestaun komplesidade oioin kona-ba feto liu-liu direitu feto hosi baze to’o nasionál.
“OPMT nu’udar órganizaun karáter uniku ne’ebé harii hosi partidu Fretilin, nune’e konferénsia ne’e atu diskute asuntu komplesidade sira no organizaun hodi hamriik servi direitu tomak feto sira-nian hanesan afirma direitu feto hahú hosi baze to’o nasionál moris igualidade ho direitu sirkunstánsia iha servisu no responsavilidade,” Mari Alkatiri hateten iha intervensaun iha salaun Katedrál, Dili, sesta ne’e.
Alkatiri fó votu susesu ba konferénsia ida-ne’e, tanba loron rua tán ne’e konferénsia sei konklui no sei eleje lideransa foun.
Nia konsidera tema hosi konferénsia define rezilénsia estátika ka rezilénsia tenke iha dinámika hosi realidade ita atu transforma sai manan obstákulu.
“Tema ne’e ho pensamentu estátika, nune’e husu delegadu konfresista atu diskute komplesidade klean mai ho vontade ida de’it lori OPMT hateke ba oin,” nia husu.
Sekretária Jerál OPMT, Florentina Martins Smith, hateten iha istória luta libertasaun nasionál ne’e OPMT tama nu’udar organizasaun pionera feto Timor nian ne’ebé partidu Fretilin harii iha 28 agostu 1975, no hosi loron ne’e to’o ohin loron OPMT hamrik nafatin ho rezilénsia katak hatene buka oinsá de’it hodi hakat dezafiu no metin nafatin.
Organizasaun masa Fretilin ne’e kontinua no sei tane ba bebeik ho valór luta nian, tanba Fretilin harii OPMT ho objetivu atu liberta feto hosi deskriminasaun iha aspeitu oioin ho nune’e promove kedas direitu igualidade no oportunidade entre feto no mane bainhira hahú prosesu luta liberta pátria no povu.
Tan ne’e, OPMT ho vizaun klaru emansipasaun feto Timor no iha misaun ho objetivu espesífiku lubuk ida-ne’ebé kontempla iha estatutu.
Konferénsia nasionál OPMT nu’udar dalan ida hodi define estratejia no halo aprovasaun estatutu ho programa ba tinan lima (5) no eleje membru órgaun nasionál OPMT nian hodi responsabiliza ba organizasaun.
Konferénsia nasionál ne’e mós nu’udar sasukat ida hodi asegura prosesu demokrátiku iha nasaun Timor-Leste ne’ebé sei fó biban ba delegada OPMT sira, hodi hadi’a no hametin haburas OPMT ba oin.
Durante ne’e, OPMT implementa ona programa sira no Kooperasaun ho parte relevante oioin hodi haree asuntu feto atu bele promove igualidade, nune’e hosi konferénsia refere sei diskute integra planu no programa reziliente liután ba oin.
Enkuantu, partisipa iha loron dahuluk ba konferénsia ne’e mak hanesan Sekretáriu Jerál Partidu Fretilin, Mari Alkatiri, Vise-Prezidente Partidu Fretilin, Aniceto Longuinhos Guterres Lopes, membru Konsellu Polítika Nasionál (CPN) partidu Fretilin, Sekretária Estadu Igualidade Jéneru no Inkluzaun, Maria José Foncesa, delegadu OPMT hosi Munisípiu 13 inklui RAEOA ho konvidadu sira seluk.
Entertantu, IV konferénsia nasionál ho tema “OPMT reziliente! Hori uluk, ohin loron no aban bainrua” ne’e hala’o durante loron tolu nia laran, hahú hosi loron 11 to’o 13 fevereiru 2022.
Jornalista : Nelson de Sousa
Editór : Cancio Ximenes
