BOBONARO, 10 marsu 2022 (TATOLI) – Servisu Saúde Munisípiu Bobonaro hahú fulan-janeiru to’o agora rejista kazu dengue hamutuk pasiente na’in 39 no labarik na’in-tolu mak mate ona.
Xefe Departamentu Programátiku Saúde Munisípiu Bobonaro, Paulino Deneri, informa pasiente hirak-ne’e iha mós ema adultu maibé barak-liu afeta ba labarik sira hosi tinan lima ba leten iha postu administrativu Maliana Vila, Balibo no Atabae.
“Ita iha munisípiu Bobonaro atualiza kazu moras dengue to’o iha semana ida-ne’e ita iha kazu 39 ne’ebe mak moras no baixa iha Hospital Referal Maliana, no labarik na’in-tolu mak mate ona” nia informa ba Agência Tatoli, iha Maliana, kinta ne’e.
Hosi númeru ne’e na’in-ida refere ba Dili la konsege salva nia vida, ida mate iha ospitál no ida mate iha área suku Tapo-Memo nian.
Daudaun ne’e Servisu Saúde Bobonaro esforsu hela maneira preventiva sira hanesan, avizu movel liuhosi karreta, halo ona fumigasaun iha área risku sira no koordena ho autoridade munisípiu Bobonaro atu hasai sirkulár ida hodi orienta líder lokál sira atu mobiliza komunidade halo limpeza jerál semana-ida dala-ida nune’e bele luta kontra moras ne’e.
“Ita-nia esforsu halo prevensaun kazu iha postu administrativu Maliana, ho ninia área risku ba surtu dengue sira hanesan suku Lahomea, Odomau, Holsa no suku Tapo-memo, maibé iha suku Tapo-Memo ita halo ona fumigasaun, hela suku tolu mak seidauk halo, tanba iha limitasaun kombustível ba transporte, maibé ita sei esforsu halo hotu fumigasaun,” nia katak.
Jornalista : Sérgio da Cruz
Editór : Evaristo Soares Martins
