BAUCAU, 11 marsu 2022 (TATOLI) – Sekretariadu Tékniku Admistrasaun Eleitorál (STAE) Munisípiu Baucau sei distribui materiál sensitivu no naun-sensitivu ho pakote molok transporta ba kada sentru votasaun no estasaun votu.
STAE Baucau sesta ne’e, simu ofisialmente materiál eleisaun prezidensíal hosi nasionál kompostu hosi materiál sensitivu hanesan buletin votu kaixote 38 ho tótal livru 2.174 no bulletin votu hamutuk 108.700.
Nune’e mós karimbu eleisaun prezidensiál 1.200 kompostu hosi nulu, kanseladu, rejeitadu, branku hamutuk ualu ne’ebé kada estasaun ida tenke iha hotu hosi tótal estasau 150.
Lista eleitór ne’ebé kada estasaun votu hamutuk haat nune’e totál lista eleitór 600 no akta inklui tinta ne’ebé sei utiliza ida no rezerva rua iha sentru no estasaun votu.
“Materiál sensitivu ne’e, komesa aban komesa ona halo pakotementu durante loron-neen,” Diretór STAE Baucau, Lúcio Freitas Salvador hateten iha salaun apuramento administrasaun Baucau, sesta ne’e.
STAE Baucau garante transparánsia nune’e husu ba fiskál kada kandidatura, observadór nasionál no internasionál, ofisiál supervizaun hosi Komisaun Nasionál Eleisaun (CNE, sigla portugés) no media sira atu akompaña prosesu pakote ne’e.
Razaun tanba tuir Lei Eleitorál ba Prezidente Repúblika, fiskál sira hahú kedas serbisu bainhira inísiu STAE halo resensiamentu eletóral to’o apuramentu munisipál.
Enkuantu materiál naun-sensitivu kompostu hosi kaixote, akta rezultadu eleisaun, formuláriu reklamasaun, pasta plástiku, fita liña, stop map no materiál seluk ne’ebe utiliza durante realiza elisaun prezidensiál.
Lúcio esplika, totál eleitór Baucau hamutuk na’in-96.207 maibé buletin votu iha aumentu pursentu 10 nune’e tótal bulletin votu iha Baucau hamutuk 108.700 tanba razaun antesipa ba fiskál, Polisía Nasionál Timor-Leste (PNTL), FALINTIL-FDTL, monitorizadór no jornalista sira-ne’ebé sei vota iha kualkér sentru votasaun tuir lei haruka.
Tuir planu materiál eleisaun hirak-ne’e hafoin halo ho pakote sei distribui ba sentru votasaun hamutuk 125 no estasaun votu 150 iha postu admistrativu neen iha Baucau iha loron 18 marsu molok eleitór sira ezerse sira-nia direitu iha loron 19 marsu.
Diretór CNE, Esmeraldo Damião Belo hateten, sei destaka ofisiál supervizaun akompaña prosesu tomak relasiona ho pakotementu materiál sensitivu no naun-sensitivu iha sala apuramentu administrasaun Baucau.
“Ha’u sujere ba fiskál kandidatu prezidente repúblika na’in-16 hotu atu hola-parte hotu durante prosesu pakotementu,” Esmeraldo hateten.
Notísia relevante : PNTL Baucau destaka membru asegura materiál eleisaun prezidensiál
Jornalista : Natalino Belo
Editór : Evaristo Soares Martins
