DILI, 16 marsu 2022 (TATOLI)— Kandidata Presidente Repúblika ho numeru sorteio 07, Maria Helena Lopes de Jesus Pires husik hela mensajen tolu ba votante sira wainhira taka kampaña ba Eleisaun Prezidensial periode 2022-2027.
“Ha’u iha mensajen tolu. Primeiru tuir ha’u nia lema ‘O nia votu mak o nia lian’. Katak, imi nia vota mak imi nia lian. Ne’e duni uza didiak votu ne’e ba muda ita nia moris no ita nia futuru rasik,” Milena Pires esplika ba jornalista iha kampaña ikus ne’ebé realiza iha Salaun Koperativa Hanai Malu Bairo-pite, kuarta ne’e.
Notisia relevante : Eleitu sai PR, Milena Pires hakarak hakbesik prezidénsia ba povu
Kandidata ne’e iha mensajen segundu, husu ba votante sira atu vota ba kandidatu liu husi hare’e nia programa ne’ebé bele kontribui atu hadia povu nia moris, liu-liu ba joven sira.
“Ha’u halo apelu ba joven sira, labele vota ba ema nia naran deit ka vota ba istoria, maibe vota ba programa ne’ebé kandidatu iha,” nia argumenta.
Notisia relevante : Iha Bobonaro, Milena Pires promete kombate ‘polítika klientilizmu’ iha administrasaun públika
Mensajen ikus, kandidata feto, Milena Pires enkoraja feto maluk sira hodi vota ba feto nune’e bele promove feto nia direitu iha Palasiu Prezidensial Bairro-pité. Vota ba feto ne’ebé iha prova ona hodi bele duni ezerse kna’ar hanesan Prezidente Repúblika.
Kandidata Prezidente Repúblika ne’e hakarak povu TL hotu bele ezerse sira nia direitu hanesan sidadaun liu husi votasaun iha loron 19 marsu 2022.
“Hili feto ida ne’ebé prova ona katak bele halo ida ne’e. Ami husu vota ho konsiensia, vota ba programa sira no hili didi’ak kandidatu ne’ebé bele kontribui ba mudansa no vota ba numeru 7 tanba ita nia vota ita nia lian,” nia esplika.
Milena Pires haktuir, Timor-Leste tempu ona hodi hili líder foun ho nia polítika foun atu bele lori mudansa positivu ba povu nia moris diak, liu-liu lori TL sai nasaun ne’ebé inklusivu liu, justu ba ema hotu atu hetan atendimentu hanesan iha lei nia okos. Tanba, lei laos ba ema kiik deit ou bo’ot deit. Maibé lei hanesan ba ema hotu.
Notisia relevante : Milena Pires kandidata an ba PR hakarak kontribui ba dezenvolvimentu
Iha kampaña ikus ne’e hetan partisipasaun husi apoiante sira husi Munísipiu Dili, liu-liu ba joven foinsa’e sira atu bele espresa sira nia hakarak ba kandidatu no saida mak presiza hodi hadi’a diak liu tan iha TL ba oin.
Tuir observasaun Agência TATOLI nian iha diálogu populár ne’e hetan observasaun hosi observadór internasional sira hosi Uniaun Europeia (UE) supervisor sira hosi Komisaun Nasionál Eleisaun (CNE-sigla portugés).
Reporter : Cidalia Fátima
Editor : Armandina Moniz
