DILI, 30 marsu 2022 (TATOLI)— Governu Repúblika Populár Xina liuhosi Embaixadór iha Timor-Leste selebra akordu ho Sekertáriu Estadu Juventude no Desportu (SEJD) hodi oferese $300.000 atu halo re-abilitasaun ba kampu futeból iha Lecidere-Dili.
“Ohin SEJD ho Governu Xina asina akordu ida atu re-abilitasaun kampu futeból iha Lecidere, ida ne’e doasaun ida hosi povu Xina ne’ebé oferese mai joven sira iha Timor-Leste hodi komemora tinan 20 kooperasaun Timor-Leste ho Xina,” Sekretáriu Estadu Abrão Nokosiku Saldanha, hateten ba jornalista-sira iha nia knaar fatin Lecidere-Dili, kuarta ne’e.
Iha ámbitu asinatura ne’e, Embaxadór Xina aprezenta kedan empreza Xanhai Corporation ne’ebe sei konstrui ba obra refere.
“Re-abilitasaun ne’e sira bele halo kedan, ohin loron tanba sira nia tarjetu antes 20 maiu bele finaliza ona atu bele uza ba komemorasaun tinan 20 kooperasaun entre Xina ho ita,” nia akresenta.
Dezeñu ba kampu ne’e empreza Xanhai mak responsabiliza, maibé haree ba espasu ne’ebé kloot kompaña sei halo tuir saida mak iha tanba kampu futeból ba jogadór 11 tama ona ba kategória kampu boot hodi oferese ba joven sira bele utiliza prátika desportu.
Iha fatin hanesan, Embaxadór Xina iha Timor-Leste, Xiao Singou, hateten ajuda ne’e Xina fó hodi komemora tinan 20 kooperasaun Timor-Leste ho Xina hodi fó ba joven sira bele hala’o atividade desportu.
“Orsamentu ne’e hanesan oferta hosi ami fó ba Governu Timor-Leste hodi halo kampu futeból ida, ami mak sei halo no entrega xave ba Governu no ami garante la too loron 20 maiu tenke prontu ona,” Diplomata ne’e garante.
Nia hatutan oferta ne’e hanesan meiu ida atu hametin liután kooperasaun entre nasaun rua iha futuru ne’ebé di’ak liután.
Jornalista: Hortencio Sanchez
Editór : Florencio Miranda Ximenes
