DILI, 07 abríl 2022 (TATOLI)—Vise Ministru Administrasaun Estatál (MAE), Lino de Jesus Torrezão, hateten programa Uma Kbiit Laek (UKL) 2022 ba faze daruak tama ona ba prosesu aprovizionamentu.
Notísia Relevante: Konstrusaun Uma Kbiit Laek faze dahuluk atinje ona 70%
“Ita agora tama ona ba prosesu aprovizionamentu, bainhira ramata mak hafoin implementa ka konstrui Uma Kbiit Laek bae ma kbiit laek sira kada suku,” Lino de Jesus Torrezão hateten ba Agência TATOLI, iha nia knaar fatin Colmera, Dili, kinta ne’e.
Daudaun ne’e, tuir nia, parte relevante verifika hotu ona no tama ba faze aprovizionamentu nian depois finaliza mak hein atu implementa UKL ne’e.
Ministru Administrasaun Estatál (MAE), Miguel Pereira Carvalho, hateten implementasaun Uma Kbiit Laek (UKL) ba tinan ne’e liuhusi Parlamentu Nasional aprova Orsamentu Jerál Estadu (OJE) 2022 ho montante hamutuk miliaun $71.
Ho orsamentu ida-ne’e, MAE sei konstrui Uma Kbiit Laek hamutuk 4.000 iha faze daruak nian ba tinan ne’e, iha teritoriu nasionál no kada suku sei hetan Uma Kbiit Laek 10.
Konstrusaun Uma Kbiit Laek ne’e korresponde ho Planu Estratejia Dezenvolvimentu Nasionál (PEDN) 2011-2030 ne’ebé mak rekoñese povu Timor-Leste nia aspirasaun atu harii nasaun ne’ebé mak forte prósperu no moris di’ak.
Notísia Relevante: Tinan 2022: Governu sei konstrui Uma Kbiit Laek 4.000
Jornalista : Osória Marques
Editór : Cancio Ximenes
