DILI, 14 abril 2022 (TATOLI)–Konsellu Jerál Universidade Nasionál Timor-Lorosa’e (UNTL) konsidera Kandidatu Prezidente Repúblika (PR) ho númeru sorteiu 1, José Ramos Horta, dezakredita universidade nasionál durante debate iha segunda volta, ne’ebé fó sai hosi transmisaun direita Rádiu Televizaun Timor-Leste, Empreza Públika (RTTL, E.P).
“UNTL sente haksolok tebes tanba UNTL nia naran temi iha Debate Prezensiál 2022 nian, maibé ami lamenta tebes ho liafuan ne’ebé Kandidatu Prezidente Repúblika, José Ramos Horta, hasai iha debate, ne’ebé hatún imajen UNTL hodi minimiza ninia kualide. Dala hira kedas Kandidatu Horta repete liafuan ne’ebé dezakredita UNTL nia imajen,” Reitór UNTL, João Soares martins, hateten liuhosi konferénsia imprensa, ne’ebé realiza iha auditórium Kampus Sentrál, kinta ne’e.
Notísia relevante: CNE indika Pe. Bento Barros sai moderadór ba debate púbiku daruak
Nia afirma, UNTL respeita nia profesór, funsionáriu administrasaun, no estudante idaidak ninia sentidu votu no lakohi atu influénsia ema ida atu vota ba kandidatu ne’ebé de’it, maibé nu’udar instituisaun públiku hakarak defende-an iha Estadu no sosiedade tomak nia oin.
“Ho nune’e, UNTL nafatin apela atu kandidatu ne’ebé povu hili sai nu’udar Prezidente Repúblika, bele apoiu nafatin UNTL, atu instituisaun ne’e bele halo ninia knaar di’ak liután ba futuru rai Timor-Leste nian,” Reitór akresenta.
UNTL estabelesidu iha tinan 2000, nu’udar instituisaun Estadu ida, ne’ebé sujeita ba avaliasaun fila-fila hosi instituisaun akreditasaun no avaliasaun independente Ajénsia Nasionál Avaliasaun Akreditasaun Akadémika (ANAAA), ne’ebé membru juri sira kompostu hosi avaliadór nasionál no internasionál, to’o ikus mai hetan akreditasaun A.
“Ida-ne’e hatudu katak UNTL kontribui ona durante tinan-10 resin ba formasaun rekursu umanu ne’ebé kontribui ba funsionamentu Estadu no nasaun Timor-Leste, inklui prepara rekursu umanu ba jerasaun foun sira tuir mai,” Reitór tenik.
Sita hosi transmisaun RTTL, EP, Kandidatu PR Horta hateten “Ita-nia entrepretasaun ne’ebé karik mai hosi UNTL, ha’u agora deskonfia ona UNTL, sé maka hasai kursu direitu iha UNTL ha’u sei la rektuta ba Prezidénsia.”
Maski nune’e, liuhosi pájina, Horta klarifika, liafuan ne’ebé nia hato’o iha debate ba Kandidatu PR, Francisco Guterres ‘Lú Olo’ hanesan liafuan halimar no nia konsidera UNTL hanesan universidade antigu liu ho kualidade a’as.
“Ohin kalan iha debate ho Kandidatu Lú Olo, ha’u halimar de’it, ha’u hatete la fiar ona UNTL tanba hasai estudante Direitu ne’ebé halo interepretasaun sabraut ba KRDTL ne’e halimar de’it, ha’u fiar nafatin UNTL nia kualidade dosente no alunu,” nia dehan.
Debate Prezidente Repúblika períodu 2022-2022 ba segunda volta organiza hosi Komisaun Nasionál Eleisaun (CNE, sigla portugés) iha loron 13 abril 2022, durante oras haat nia laran, hahú 19:00 to’o 23:00, iha iha salaun Oka, Surikmas.
Moderadór ba Debate Prezidente Repúblika mak Padre Bento Barros, ho tema “Konstituisaun Repúblika Demokrátika Timor-Leste (KRDTL) no Relasaun Internasionál ne’ebé Timor-Leste iha ho nasaun sira seluk.”
Debate fahe ba sesaun haat hanesan intervensaun hosi kandidatu, perguntas hosi moderadór no responde, perguntas hosi painél ba kandidatu na’in-rua, inklui pergutas no resposta hosi kandidatu na’in-rua.
Jornalista : Tomé Amado
Editora : Julia Chatarina
