DILI, 21 abríl 2022 (TATOLI)—Komunidade Nunumoge, Manuel dos Santos, hosi suku Nunumoge, postu administrativu Hatubuilico, munisípiu Ainaro, iha esperansa ba kandidatu Prezidente Repúblika períodu 2022-2027, José Ramos Horta, ne’ebé reeleitu sai Prezidente Repúblika Timor-Leste dalimak ne’e bele dezenvolve infraestrutura bázika iha Timor-Leste.
Nia husu ba Prezidente Repúblika foun atu hamatan ba infraestrutura bázika tanba estrada no bee-moos mak importante ba povu aileba sira atu buka moris, liu-liu husu atu haree kona-ba bee-moos, eletrisidade no hadi’a estrada iha Hatubuilico, nune’e bele fasilita ema atu bele vizita sítiu turizmu relijiozu Ramelau.
“Ita labele dehan dezenvolvimentu la la’o maibé ita sente uitoan rezultadu dezenvolvimentu ne’e, hanesan balun asesu ona ba estrada, bee moos no eletrisidade. Maibé, ba ami Hatubuilico ne’e la sente tanba ami-nia estrada to’o agora ladi’ak, ne’ebé komesa hosi Maubisse tama to’o Hatubuilico Ramelau hun, ida ne’e estrada ladi’ak. Tanba ne’e, ami espera ita-nia Prezidente foun ne’e bele haree ba ida-ne’e,” Manuel dos Santos hateten ba Agência Tatoli, iha Colmera, Dili, kinta ne’e.
Alende estrada, ba eletrisidade, iha Hatubiliku mós balun asesu no balun seida’uk, nune’e mós ba bee moos, tanba ne’e, espera Prezidente Repúblika ba períodu 2022-2027 ne’e bele tau kestaun ne’e hodi pronunsia ba Governu atu bele hamatan ba preokupasaun ida-ne’e.
Maske nune’e, nu’udar sidadaun ida-ne’ebé ezerse nia direotu votu, nia sente kontente ho kandidatu Prezidente Repúblika, José Ramos Horta, ne’ebé eleitu ona ba Prezidente Repúblika períodu 2022-2027 hodi halakon ninia adversáriu Francisco Guterres Lú Oli.
“Ha’u sente kontente ba ita-nia prezidente foun ne’e, tanba aban bainrua nia mak lori dezenvolvimetu ba oin, nune’e ha’u espera Prezidente foun ne’e kumpre buat ne’ebé Prezidente promesa ba ami povu, durante kampaña eleitorál,” nia afirma.
Komunidade, Fidelis da Costa, hosi suku Lifau, postu administrative Pante Makasar, munisípiu Oé-Cusse, sente haksolok tanba Laureadu Prémiu Nobel da Paz, José Ramos Horta eeleiru sai Prezidente Prezidente Repúblika períodu 2022-2027 hodi tau matan ba povu ai-leba nia moris.
“Ba ha’u agradese, ba sé de’it mak sai prezidente naran katak dalan ba ami luan, atu nune’e ami bele la’o livre hodi faan ami-nia sasán. Tanba durante ne’e, mosu problema hanesan tuda malu no baku malu to’o mosu COVID-19 hodi taka dalan halo ami povu ai-leba sira labele la’o hodi faan ami-nia sasán. Karik, ba oin sé de’it mak sai Prezidente naran katak ami hakmatek, nune’e bele buka moris hodi haree familia no oan sira-nia eskola. Tanba, ami faan iha fatin uitoan ne’e la hakmatek, dala ruma saneamentu mai duni ami, maibé ami pasiénsia tanba buka moris,” nia dehan.
Entretantu, tuir Sekretáriu Tékniku Administrasaun Eleitorál (STAE), konklui ona apuramentu iha nível nasionál hafoin kontajen nível munisipál no diáspora iha loron 20 abríl 2022 ne’e, hatudu katak kandidatu Prezidente Repúblika ho númeru sorteiu ida (1), José Ramos Horta, ho votu 397,145 (62,09%) no kandidatu ho númeru sorteia rua (2), Francisco Guterres Lú Olo, ho votu 242,440 (37,91%).
Nune’e, STAE haruka ona rezultadu material apuramentu nasionál provizóriu ba Komisaun Nasionál Eleisaun (CNE) hodi verifika apuramentu nasionál iha CNE durante 72 molok submete ba Tribunál Rekursu hodi foti desizaun ikus tuir lei ne’ebé vigór iha Timor-Leste.
Jornalista : Nelia Fernandes
Editór : Cancio Ximenes
