DILI, 12 juñu 2022 (TATOLI)—Ministru Agrikultura no Peska (MAP), Pedro dos Reis, halo lansamentu kolleta hare iha rai ektare 17 iha suku Fahi-Ria, postu administrativu Aileu vila, munisípiu Aileu.
Ministru MAP, Pedro dos Reis, hateten, daudaun ne’e nasaun hotu hasoru krize mundiál tanba kauza funu entre Ukránia no Rúsia halo sasán hotu folin sa’e, nune’e Timor-Leste hanesan nasaun kiik, maibé iha rai bokur barak, tanba ne’e mak MAP hamutuk ho diresaun, ekstensionista no autoridade lokál sira serbisu hamutuk ho agrikultór atu hasoru krize ne’ebé mak iha liuhosi hasa’e produsaun iha rai-laran.
“Iha suku Fahi-Ria, munisípiu Aileu, ita iha natar ektare 385, ita hahú ona prátika agrikultura di’ak no hatudu progresu di’ak. Tanba ne’e, ohin ita kolleta ona ektare 17 iha fatin ida-ne’e no ita la uza adubudu, maibé ita uza agrikultura di’ak, ita bele hetan tonelada haat pur ektare,” Ministru hateten liuhosi nota ne’ebé Agência Tatoli asesu, domingu ne’e.
Notísia relevante: Cesta Bázika faze daruak millaun $80, CCI-TL husu investe ba setór produtivu
Governante ne’e dehan, ho situasaun pandemia no krize mundiál ne’ebé daudaun ne’e afeta ba mundu tomak, folin sasan sa’e, tanba ne’e kontribuisaun ne’ebé bele halo iha situasaun ne’e mak komunidade hotu filafali ba natar hodi hasa’e produsaun iha rai-laran.
“Saida mak ita atu fornese ba ita-nia rai hodi sai hosi krize ba ai-han, ida-ne’e mak ita hotu hamutuk hodi hasa’e produsaun, la’ós iha fatin ne’e de’it maibé iha territóriu Timór laran tomak, nune’e bele responde ba programa VIII Governu ne’ebé atu hamosu Cesta Bázika faze daruak,” nia enkoraja.
Programa ne’e realiza hosi Asosiaun Tane Hamutuk, ho kolaborasaun Diresaun Agrikultura no Ortikultura, ne’ebé partisipa hosi Administradór postu administrativu munisipiu Aileu, Diretór Nasional Ortikultura, Komandante Eskuadra munisípiu Aileu, Prezidente Ana Profitu, autoridade no komunidade lokál.
Jornalista : Arminda Fonseca
Editora : Julia Chatarina
