DILI, 20 juñu 2022 (TATOLI)–Profesór na’in-25 hosi Eskola Ensinu Sekundáriu Tékniku Vokasionál ne’ebé asume kargu xefia ameasa rezigna-an hosi kargu nu’udar Diretór Adjuntu no Gabinete Apoiu Tékniku (GAT) tanba tinan neen ona la hetan subsídiu retroativu hosi Governu.
Diretór Eskola Tékniku Vokasionál Hera, Francisco da Costa, hateten, tinan-neen ona sira asume pasta kargu xefia nu’udar Diretór hodi lidera Eskola TEKVOK ne’ebé Ministériu Edukasaun Juventude no Desportu (MEJD) estabelese to’o ohin loron tama ona tinan-neen, maibé direitu atu hetan subsídiu ba retroativu nunka akontese.
“Ami la kontente tanba Ministériu Edukasaun Juventude no Desportu la trata ami-nia direitu hanesan ho kargu xefia sira seluk iha Eskola Ensinu Sekundáriu Jerál, ne’ebé seluk hetan ona direitu maibé tinan neen ona ami la hetan direitu,” Diretór eskola informa ba Agência Tatoli, via telefónika, segunda ne’e.
Notísia relevante: Komisaun G kontinua ezije MEJD aselera saláriu retroativu ba manorin sira
Nia dehan, sira sei nafatin ezije ba Governu liuhosi MEJD atu lalais rezolve problema ne’ebé sira enfrenta tanba tinan barak ona seidauk rezolve.
“Molok mandatu Governu ida-ne’e ramata, husu atu hetan ona rezultadu,” nia akresenta.
Diretór Jerál Administrasaun Finansas MEJD, Antoninho Pires, haktuir, nomeasaun retroativu ba kargu xefia na’in-25, hahú ona iha tinan 2017 to’o agora, ne’ebé Komisaun Funsaun Públika (KFP) rasik mak deside ka nomea ona kargu xefia ba dirijente sira ne’e ho direitu ba pagamentu retroativu.
Tuir Diretór, bainhira nomeasaun ne’e iha ona, sira iha ona direitu ba kargu xefia. Ho nune’e Ministériu tenke selu direitu kargu xefia hahú hosi loron ne’ebé KFP deside ba kargu xefia sira.
“Maski sira seidauk simu direitu ba retroativu, maibé ita-nia dirijente sira asume kargu xefia ne’e la kontente tanba balun hetan de’it dolar ida ou rua kada-fulan,” nia tenik.
Diretór dehan, bazeia ba dekretu-lei númeru 33 ne’ebé estabelese ba jestaun eskola nian, sira hetan pagamentu retroativu ne’e bazeia ba númeru estudante.
“Kuandu eskola balun hetan númeru alunu boot, maka sira-nia subsídiu retroativu mós boot maibé kuandu númeru alunu menus konserteza sira-nia subsídiu retroativu mós kiik. Kargu xefia sira agora sei simu hela sira-nia saláriu mensál, ne’ebé sira-nia direitu ba subsídiu sei iha hela prosesu nia laran. Agora KFP hatún ona despaixu ne’ebé hain de’it atu halo prosesu pagamentu ba sira,” nia salienta.
Jornalista : Tomé Amado
Editora : Julia Chatarina
