DILI, 06 jullu 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova ona projetu dekretu-lei rua hosi Ministériu Edukasaun, Juventude, no Desportu (MEJD), no Sekretáriu Estadu Juventude no Desportu (SEJD).
Projetu dekretu-lei ne’e aprezenta hosi Ministru Edukasaun, Juventude no Desportu, Armindo Maia no Sekretáriu Estadu Juventude no Desportu, Abrão Saldanha.
“Projetu dekretu-lei ne’e hodi revoga dekretu-lei númeru 39/2011, loron 21 setembru, ne’ebé regula Komisaun Nasionál Desportu (KND) no kria estrutura foun no enkuadramentu ba komisaun nian, nune’e mós delimita kompeténsia, kompozisaun no funsionamentu hodi kontinua ho prosesu dezenvolvimentu prátika desportiva iha Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Notísia relevante: Hamenus burokrasia servisu, Governu altera orgánika MEJD
Nune’e, halo alterasaun dahuluk ba dekretu-lei númeru 18/2019, loron 11 jullu, ne’ebé aprova ona orgánika SEJD.
“Projetu dekretu-lei ne’e ho objetivu atu adekuada orgánika ministériu ida-ne’e nian, ne’ebé estabelese ona iha dekretu-lei númeru 30/2020, loron 29 jullu, kona-ba organizasaun administrasaun direta no indireta Estadu,” nia akresenta.
Aleinde ne’e, hakarak mós adekuada ba prosesu dezkonsentrasaun no desentralizasaun ne’ebé la’o hela, hodi promove autorizasaun ida entre responsabilidade no kompeténsia administrativa sira ne’ebé pertense ba servisu sentrál sira hosi SEJD.
Prevee mós ezisténsia diresaun jerál ida-de’it ba juventude no desportu, reestruturasaun no agrupamentu ba unidade no diresaun nasionál balun.
Jornalista : Antónia Gusmão
Editora : Julia Chatarina
