VIQUEQUE, 07 jullu 2022 (TATOLI)–Ekipa hosi Ministériu Finansa (MF), kinta ne’e, halo diseminasaun jestaun patrimóniu Estadu ne’ebé funsionáriu sira uza iha munisípiu Viqueque, durante loron-rua.
“Oinsá halo jestaun ba patrimóniu Estadu nian, pontu importante ne’ebé ami fahe maka hanesan siklu jestaun patrimóniu Estadu, liuliu jestaun inventarizasaun, jestaun identifikasaun, no jestaun ba viatura Estadu,” Diretora Nasionál no Jestaun Bens no Móvel hosi MF, Timotia Marques, hateten ba Agência Tatoli, iha salaun administrasaun munisipál, kinta ne’e.
Notísia relevante: Hahú ohin, veíkulu Estadu “para” iha eskritóriu
Rekezitu foun ba jestaun patrimóniu Estadu hahú implementa iha loron 14 janeiru 2022 ba instituisaun Estadu hotu, maibé ekipa MF mai Viqueque hodi hasa’e koñesimentu ba diresaun lojístika atu jere patrimóniu ne’ebé sai instrumentu ida hodi hala’o atividade instituisaun.
“Entaun ami mai atu reforsa liután diresaun lojístika sira hodi hatene sira-nia knaar halo jestaun ba patrimóniu Estadu ne’ebé maka iha munisípiu Viqueque,” nia akresenta.
Nia dehan, funsionáriu sira labele uza kareta Estadu bá uma no utiliza ba atividade privadu sira, maibé utiliza kareta ba atividade serbisu.
“Iha munisípiu Viqueque seidauk prepara kondisaun ba fatin karreta para. Tanba ne’e maka sai preokupasaun ba autoridade munisípiu hodi implementa,” nia tenik.
Iha fatin hanesan, Administradór munisípiu Viqueque, Januário Soares ‘Bolly’, hateten, karta sirkulár sai ona atu halo kontrolu patrimóniu Estadu, maibé munisípiu Viqueque seidauk implementa tanba kondisaun fatin maka seidauk prepara.
“Konstrusaun morru haleu administrasaun daudaun ne’e la’o hela, hotu tiha mak ita foin bele prepara fatin estasionamentu ba kareta no motorizada sira. Ha’u sente agora ita seidauk bele implementa tanba kondisaun fatin seidauk iha,” nia tenik.
Nia dehan, bainhira munisípiu prepara ona estasionamentu, patrimóniu Estadu hotu sei para iha fatin, kuandu diresaun sira presiza veíkulu tenki submete pedidu, hafoin parte patrimóniu bele responde.
Atividade diseminasaun ne’e partisipa hosi Administradór postu, Diretór munisípiu Viqueque, Diretór liña ministeriál, Xefe Departamentu no Polísia Nasionál Timor Leste (PNTL) munisípiu Viqueque unidade tránzitu.
Jornalista : Vitorino Lopes da Costa
Editora : Julia Chatarina
