DILI, 12 jullu 2022 (TATOLI)—Diretór Ezekutivu Servisu Autonómu Medikamentu no Ekipamentu Saúde (SAMES), Santana Martins, informa estoke ai-moruk ho tipu 190 ne’ebé ekivalente ho 37% mamuk iha armazein.
“Tipu ai-moruk sira ne’ebé mak ita rejistu hamutuk 520, hosi númeru ne’e estoke ai-moruk laiha ka mamuk 190 ka 37%, tipu ne’ebé daudaun disponivél iha armazein 330 ka 63%,” Santana Martins ba Agência TATOLI nia kna’ar fatin Kampu-Alor, tersa ne’e.
Estoke ai-moruk ho tipu 190 ka 37% ne’ebé mamuk, nia dehan aprezenta ona ba Ministériu Saúde atubele fó autorizasaun hodi loke konkursu públiku ba akizasaun.
“Ami aprezenta ona ba Ministériu Saúde atu deside halo ka loke konkursu ba akizasaun ai-moruk ne’ebe estoke mamuk”, nia afirma.
Estoke ai-moruk vitál ne’ebé iha hamutuk tipu 97, hosi númeru ne’e estoke mamuk hamutuk 22 ka 23% no estoke ne’ebé disponivél iha armazein tipu hamutuk 75 ka 77%.
Kona-ba, estoke ai-moruk nesesáriu hamutuk tipu 103, hosi númeru ne’e estoke ai-moruk 45 ka 44% mak mamuk ona no estoke ne’ebé disponivél hamutuk tipu 58 ka 56%.
Entertantu, estoke ai-moruk esensiál ne’ebé iha hamutuk tipu 229, hosi ne’e tipu 73 ka 32 % mak mamuk no tipu ai-moruk disponivél hamutuk 156 ka 68%.
“Ha’u husu ba fasilidade saúde sira ne’ebé mak estoke mamuk bele halo pedidu mai iha SAMES atu halo distribuisaun ai-moruk”, katak nia.
Iha tinan 2022, SAMES prevee orsamentu hodi kompras medikamentu hamutuk millaun $5.6.
Jornalista : Felicidade Ximenes
Editór : Florencio Miranda Ximenes
