DILI, 13 jullu 2022 (TATOLI)—Diretór Ezekutivu Centro Nacional Chega (CNC), Hugo Maria Fernandes, hateten daudaun ne’e CNC simu ona dezeñu finál estabelesimentu sentru arquivu hosi empreza, ne’ebé durante ne’e dezeña hela konstrusaun sentru arkivu.
Notísia Relevante: Estabelesimentu sentru arkivu istóriku sei hein dezeñu finál hosi empreza
“Ami simu ona dezeñu (Planta no Kadernu Enkargu ka BoQ) finál hosi kompañia ne’ebé mak durante ne’e dezeña. Tanba, antes sira submete, sira tenke submete mai iha ami halo verifikasaun no tenke lori ba ADN no Ministériu Obra Públika halo aprovasaun,” Hugo Maria Fernandes, hateten ba Agência Tatoli, iha nia knar fatin, Antigu Komarka Balide, Dili, kuarta ne’e.
Planta no Kadernu Enkargu ba konstrusaun sentru arkivu to’o ona mai iha CNC, hein katak ida ne’e aprovasaun finál ona hosi Ministériu ObrasPúblika ho mós ADN.
“Ha’u seidauk check, tanba sira foin lori mai rai iha ne’ebá. Se to’o fulan ida-ne’e mak sira aprova hotu ona, entaun fulan oin mak ita foin loke konkursu públiku,” nia dehan.
Prosesu loke konkursu públiku ne’e, nia esplika, normalmente iha desizaun ida atu halo prosesu prokuramen ne’e dala ruma fulan ida.
“Kompañia sira tenke hatama dokumentu mai, nune’e hatama mai tenke iha fali avaliasaun. Iha avaliasaun ne’e mós ita seida’uk iha serteza seraque kompañia sira hatama mai ne’e hotu-hotu prenxe kritéria ka lae. Se buat hotu la’o di’ak, hanesan buat hotu la’o tuir de’it dalan ne’ebé iha kompañia ne’ebé manán, konstrusaun minimu nia sei hahú iha fulan setembru ka outrubru iha tinan ne’e. Se buat hotu la’o normál, tanba prosesu prokuramen ne’e mós han tempu,” nia dehan.
Satán, nia hateten, konstrusaun ne’e kompañia sira presiza sosa dokumentu projetu nian, sira ba halo estudu, depois sira halo kalkulasaun mak sira foin hatama mai, ida-ne’e de’it dala ruma bele han fulan ida.
“Prosesu ne’e hotu tiha mak tama fali mai iha ne’e, harii ekipa avaliadór. Hosi prosesu avalia ne’e mós bele han tan fulan ida. Ne’ebé, prátikamente, agostu no setembru hetan kompañia mak manán, entaun outubru karik mak foin bele hahú prosesu konstrusaun. Entaun, ne’e signifika katak tinan ida-ne’e projetu hahú, maibé lada’uk kompleta. Entaun ami tenke re-aloka osan ba tinan oin. Klaru ona katak ho ida-ne’e tenke re-aloka osan ba tinan oin,” nia esplika.
Jornalista : Nelia Fernandes
Editór : Cancio Ximenes
