DILI, 28 jullu 2022 (TATOLI)—Prezidente Konsellu Administrasaun Autoridade Portuária Timor-Leste (APORTIL), Lamartinho de Oliveira, hateten, daudaun ne’e sira-nia parte prosesa ona ajénsia balun ba Tribunál tanba la selu dívida ba importasaun hahú hosi tinan 2016 to’o agora.
“Desde tinan 2016 to’o mai agora iha ajénsia ne’ebé hatama sasán iha APORTIL la selu dívida ne’e hamutuk iha 11, entaun ita prosesa ona lima ka neen ba Tribunál hodi rezolve,” Lamartinho de Oliveira ba Agência Tatoli, iha ninia knaar fatin, Colmera, kinta ne’e.
Nia dehan, ajénsia sira ne’ebé prosesa ona ba Tribunál ne’e tanba sira-nia parte halo ona xamada beibeik atu ajénsia sira selu taxa ba sasán sira ne’ebé hatama mai iha APORTIL, maibé ajénsia sira ne’e la kumpre entaun sira tenke prosesa ba Tribunál bazeia ba lei ne’ebé iha.
Notísia relevante: APORTIL rekolla reseita millaun $2 resin durante fulan-neen
Nune’e mós, Pontu Vogal II APORTIL, Tito Morreira, hateten, entre ajénsia 11 ne’e iha ajénsia rua ka tolu mak seidauk selu loloos dívida.
“Restu ne’e selu duni ona maibé foin selu sorin de’it. Ita-nia ajénsia ne’ebé selu ona taxa ba APORTIL ne’e mak hamutuk milliaun $1,1, maibé ajensia sira ne’ebé la selu dívida ne’e hamutuk milliaun $4 no kada ajénsia sira atu selu dívida hahú hosi $700.000 to’o milliaun $1,” nia akresenta.
Ajénsia sira ne’ebé la selu dívida ne’e hahú hosi ajensia nasionál no internasionál.
Jornalista : Arminda Fonseca
Editora : Julia Chatarina
