VIQUEQUE, 01 agostu 2022 (TATOLI)—Servisu Rejistu no Verifikasaun Emprezariál, Institutu Públiku (SERVE, I.P) rekolla ona taxa renovasaun no alterasaun hamutuk $753 ba kofre Estadu iha fulan-juñu to’o jullu.
“Ha’u foin mai asume knaar hanesan koordenadora SERVE, I.P Viqueque durante fulan-rua ne’e, ami konsege rekolla taxa hosi negosiante sira ne’ebé maka mai halo renovasaun no alterasaun ho totál osan hamutuk $753,” Koordenadora SERVE, I.P, Celestina da Conceição Soares, hateten ba Agência Tatoli, iha ninia knaar fatin, iha munisípiu Viqueque, segunda ne’e.
Notísia relevante: SERVE, I.P hatama reseita $100.000 durante abril to’o juñu
SERVE, I.P Viqueque rejista negosiante kiik foun (enin) hamutuk 27, LDA hamutuk ida no kompañia hamutuk tolu, nune’e iha fulan-rua nia laran halo renovasaun ba negósiu tipu enin hamutuk 17, tipu kompañia hamutuk 22 no alterasaun LDA hamutuk ida, tipu unipesoál hamutuk 13.
Nune’e, rekolla taxa hosi rejista hamutuk $507 iha fulan-juñu no taxa hamutuk $246.00 rekolla iha fulan-jullu.
“Negosiante sira ne’ebé mai halo rejista foun ba atividade negósiu ami fó gratuita. Atu halo renovasaun no alterasaun maka selu, maibé ami sei haree renova lisensa kiik sira la selu, renova lisensa sira hanesan restaurante, ofisina no otél sira ne’e selu kada tinan ida ho kustu $45,” nia tenik.
Tuir Koordenadora, daudaun negosiante balun iha munisípiu Viqueque seidauk hatene papel SERVE, I.P, tanba ne’e kria ona planu atu halo sosializasaun ba postu lima kona-ba rejistu negósiu ba komunidade iha área rurál.
“Tanba ne’e ami kria ona planu ba tempu badak sei tun ba postu lima atu halo sosializasaun ba komunidade ne’ebé halo negósiu, hafoin ami mós halo rejistu lisensa movel,” nia subliña.
Nune’e, Koordenadora fó hanoin ba negosiante sira bainhira rejista atividade iha SERVE, I.P, negosiante sira hetan benifísiu ida hanesan bele asesu kréditu iha banku sira, tanba ne’e servisu ne’e hakarak hakbesik-an ba komunidade hodi partilla informasaun ba komunidade.
Jornalista : Vitorino Lopes da Costa
Editora : Julia Chatarina
