DILI, 20 jullu 2022 (TATOLI)—Servisu Rejistrasaun no Verifikasaun Emprezariál, Institutu Públiku (SERVE, I.P) rekolla ona reseita hamutuk $100.000 ba kofre Estadu durante abril to’o juñu.
“Reseita kompara agora ho tinan kotuk ne’e agora di’ak ona tanba negósiu sira hahú la’o filafali no renova filafali sira-nia lisensa hodi hala’o sira-nia atividade. Ida-ne’e hatudu katak negósiu hahú la’o normál ona, Governu mantein apoiu setór privadu sira, tanba sira hetan moris di’ak no hetan reseita di’ak, Estadu mós hetan reseita tanba 10% filafali mai Estadu,” Diretór Ezekutivu SERVE, I.P, Florêncio da Costa Sanches, informa ba Agência Tatoli, iha ninia knaar fatin, Hudi-laran, kuarta ne’e.
Notísia relevante: SERVE, I.P inisia rejistu móvel ba empreza territóriu laran iha agostu
Nia dehan, reseita ne’ebé tinan ne’e sa’e maioria mai hosi área turizmu, agrikutura, inklui loja kiik sira.
“Área agrikutura sa’e tanba programa Cesta Bázika ne’ebé hanesan mákina atu dudu área agrikultura sa’e, ne’e hatudu katak negosiante sira hahú halai ona ba área produtivu, la’os área konstrusaun fali, enkuantu turizmu sa’e tanba polítika Governu loke odamatan ba ema halo investimentu ba área turizmu nian,” nia akresenta.
Kompara ho tinan-lima no hitu ba kotuk, empreza sira ne’ebé iha área konstrusaun mak sa’e liu, okupa 50% maibé agora menus ona tanba Governu nia polítika Cesta Bázika no investimentu turizmu nian.
“Empreza ne’ebé daudaun ita rejista ne’e hamutuk 37.000, hosi númeru ne’e 110 mai hosi empreza internasionál, ne’e ba área konstrusaun no área transporte áereu nian, maibé barak liu ne’e empreza nasionál no hosi númeru 37.000 ne’e empreza 18.000 mak área negósiu kiik, ho 60% seluk ne’e ba área konstrusaun,” nia tenik.
Jornalista : Arminda Fonseca
Editora : Julia Chatarina
