DILI, 18 agostu 2022 (TATOLI)—Primeiru-Ministru, Taur Matan Ruak, hateten loron 20 agostu nu’udar loron importante ba FALINTIL atu halo insurreição geral ba forsa armada sira (FALINTIL) atu luta ba ukun rasik an.
“Loron ne’ebé ita deklara insurreição jeral Forsa Armada hodi hahú luta no funu ba ukun rasik an,” Xefe Governu, Taur Matan Ruak, hateten ba Agência TATOLI, relasiona ho komemorasaun aniversáriu FALINTIL ba dala-47 (20 agostu 1975-20 agostu 2022) ho tema “Incrementar os Valores das FALINTIL no Processo de Reconstruçao Nacional”, iha nia rezidénsia Faról, Dili, kinta ne’e.
Tanba ne’e, Xefe Governu hakarak parabens ba povu no ba FALINTIL (Forças Armadas da Libertacao Nacional de Timor-Leste) sira hotu iha Timor-Leste.
“Parabéns ba povu Timor-Leste tomak liu-liu ba FALINTIL sira iha loron 20 agostu tinan ne’e,” Taur tatoli.
Tuir dokumentu ne’ebé Agência Tatoli asesu haktuir, Forças Armadas da Libertacao Nacional de Timor-Leste (FALINTIL) harii hafoin partidu União Democrátika Timorense (UDT) halo golpe iha 11 agostu 1975, ho objetivu la’ós de’it atu halo kontra-golpe maibé atu defende ukun-rasik-an ba Timor-Leste.
Hosi ida-ne’e, FALINTIL kuiñesidu ho Liman Kro’at Povu nian, nune’e membru Comite Central FRETILIN (CCF) sira-ne’ebé hakiduk ba Aileu, hahú organiza an hodi halo kontra-golpe liuhosi Proclamação Insurreição Geral Armada iha Aisirimou, Aileu, iha loron 15 fulan-agostu 1975.
Iha 20 agostu mak mosu naran FALINTIL (Forças Armadas da Libertacao Nacional de Timor-Leste), no saudozu Nicolau Lobato, atuál Sekretáriu Jerál FRETILIN-Mari Alkatiri mak muda fali naran ida Forças Armadas da Defesa do Povo Maubere ne’ebé antes ne’e funda ba fali FALINTIL.
Iha biban ne’e, Komandante Jerál Rogerio Lobato deklara naran ida FORÇAS ARMADAS DA DEFESA DO POVO MAUBERE ne’e, muda fali ba naran Forças Armadas da Libertção Nacional de Timor-Leste (FALINTIL).
Jornalista : Osória Marques
Editór : Cancio Ximenes
