BAUCAU, 18 agostu 2022 (TATOLI) – Komuinidade hosi Suku Bucoli, postu administrativu Baucau Vila, harii Asosiasaun Arté no Kultura ne’ebé hanaran ASTERA ho objetivu halibur grupu arté lokal ne’ebé eziste iha suku.
Koordenadór jerál Asssiasaun ASTERA suku Bucoli, Zacarias da Costa, hateten, objetivu harii ASTERA atu halibur arte no grupu kultura hotu-hotu ne’ebé eziste iha suku Bucoli ne’ebé konsidera hanesan arté kultura lokál.
“Atu hateten asosiasaun harii atu halibur grupu arté kultura hotu ne’ebé eziste iha suku Bucoli ne’ebé ita konsidera hanesan arte kultura lokál,” Koordenadór jerál Asssiasaun ASTERA hateten iha Bucoli, kinta ne’e.
ASTERA sei envolve grupu arte kultura sira hanesan moradór sira, grupu kanta kulturál, sertame inklui sei iha kriasaun ba drama komunitária no puíza ka lia-dadoli.
ASTERA hahú harii iha tinan-2022, ne’ebé envolve membru hamutuk na’in-27 komposta hosi intelektuál no lideransa komunitária atu hamutuk tau-matan ba asosiasaun iha futuru.
Diretór Nasionál Patrimóniu Kultura SEAK, Paulino dos Santos Oliveira, hateten, governu kontinua fó importánsia ba programa patrimóniu kulturál ne’ebé kompostu hosi sensibilizasaun kona-ba importánsia salva guarda patrimóniu kulturál, materiál ne’ebe kobre iha territóriu nasionál.
Nune’e mós programa seluk mak tau prioridade ba prezervazaun valorizasaun ba patrimóniu kulturál, liuliu apoia ba grupu kulturál industria kreativa kulturál sira inklui uma-lulik.
“Hodi Sekretaria Estadu nia-naran fó agradese ba asosiasaun arte kultura iha Bucoli ne’ebé ho inisiativa hamenus ona serbisu identifikasaun arte kultura nian tanba ne’e ha’u hanoin xefe suku hotu-hotu hanoin kria asosiasaun arté kultura iha suku atu fasil hetan dadus,” Diretór Nasionál Patrimoniu Kultura hosi SEAK hateten iha Bucoli, kinta ne’e.
Jornalista : Natalino Belo
Editór : Evaristo Soares Martins
