DILI, 22 agostu 2022 (TATOLI)—Ekipa konjunta kompostu hosi Ministériu Justisa (MJ) no Komisaun Anti Korrupsaun (CAC, sigla Portugés), hahú halo inspesaun ba kompañia-sira ne’ebé la kumpre kontratu hodi selu arrendamentu rai no uma Estadu.
Ekipa konjunta ne’e kompostu hosi Ministériu Justisa liuliu Gabinete Inspesaun Auditória (GIA), Diresaun Terras no Propridade, Serbisu Kadástru, Komisaun Anti Korruppsaun (CAC, sigla Postugés), Servisu Rejistu no Verifikasaun Emprezariál, Institutu Públiku (SERVE, I.P), Serbisu Migrasaun (SM) hosi Ministériu Interiór no Sekretária Estadu Formasaun Profisionál no Empregu (SEFOPE).
Nune’e, Ministériu Justisa (MJ) hahú konvoka enkontru ho liña ministeriál atu estabelese komisaun konjunta ida ho baze legalidade ka ho diploma ne’ebé tuir nivél operasionalizasaun, nune’e tuun ba tereñu halo averigusaun ba empreza nasionál no internasionál hamosu irregularidade balun.
“Iha fulan setembru, Ministériu Justisa hamutuk komisaun konjunta sei tuun bá tereñu hodi halo averiguasaun ba kompañia nasionál no internasionál ne’ebé to’o agora seidauk selu arredamentu ba Estadu inklui hirak ne’ebé faan rai no uma estadu ba ema seluk sein koñesimentu hosi autoridade kompetente liuliu Ministériu Justisa,” katak Ministru Justisa, Tiago Amaral Sarmento ba jornalista sira iha knar fatin, Colmera-Dili, segunda ne’e.
MJ liuhosi Terras no Propriadade sei haree liubá arredamentu, SERVE sei haree lisensa negósiu, Serbisu Migrasaun sei haree ba vistu traballu liuliu traballadór ne’ebé serbisu iha kompañia, SEFOPE sei haree liuba iha traballadór sira no CAC foku ba iha irregularidade ne’ebé komete hosi kompañia sira liuliu la selu arrendamentu hodi halo prosesu ba sira.
Tuir relatóriu hosi Gabinte Inspesaun Auditoria (GIA), Ministériu Justisa nian iha empreza nasionál no Internasionál hamutuk 85 maka la selu arredamentu ba Estadu no iha kompañia nasionál no Internasionál na’in-neen mak iha hela kontratu arredamentu ho Estadu, maibé faan tutan rai no uma Estadu ba ema seluk la liuhosi koñesimentu Ministériu Justisa.
“Ha’u hanoin kona-ba kestaun arredamantu, la’ós Ministériu Justisa nia responsabilidade de’it, maibé entidade hotu nian. Komisaun konjunta ne’e sei hala’o nia kna’ar iha setembru nia laran ita sei halo uluk ba kompañia nasionál no international iha Dili,” nia afirma,
Iha inspesaun ne’e, Governante ne’e dehan komisaun detata irregularidade, MJ no CAC sei submete relatóriu ne’e ba Ministériu Públiku atu haree arredatóriu sira ne’ebé la kumpre lei arrendamentu.
Iha biban hanesan, Komisáriu KAK, Sergio Hornai, hateten CAC prontu apoia ba programa MJ nian atu kontrola no administra di’ak liután bens no moveis Estadu nian.
“Ita atu apoia Governu nia planu liuliu Ministru Justisa hakarak halo kontrolu ba propriadade bens no moveis estadu nia, kuandu se mak hakarak halo atividade negósiu no ekonomiku tenke selu arredamentu ba estadu,” katak Komisáriu KAK ne’e.
Tanba, tuir lei númeru 13/2017, kona-ba rejime júridiku ba titularidade propriadade, bems no moveis hateten rai sira ne’ebé pertese ba estadu nian ne’e estadu maka administra ka kontrola tomak husi estadu atraves liu hosi MJ.
Jornalista: Natalino Costa
Editór : Florencio Miranda Ximenes
