DILI, 31 agostu 2022 (TATOLI)— Ministériu Saúde (MS), liuhosi Diresaun Nasionál Farmasia no Medikamentu, sei haruka ai-moruk tipu lima bá laboratóriu Therapiutic Goods Austrália hodi hala’o teste nia-kualidade, molok pasiente sira konsumu.
Tipu ai-moruk lima ne’ebé atu haruka ba teste nia-kualidade mak ai-moruk aspirin (Ai-moruk ba moras kordiovaskular), ampicillin (ai-moruk antibiotiku), bisoprolol (ai-moruk hipertensaun)), glibenclamide (ai-moruk ba diabetes) no Oxytocin (ai-moruk ba inan-isin rua).
“Aimoruk tipu lima ne’e nia formatu ami priense ona no halo ona konfirmasaun ba laboratóriu iha Austrália hodi prepara atu simu, nune’e ita hahú prepara fatin hodi asegura didi’ak temperatura atu bele bá to’o Austrália ho di’ak atu halo teste ba kualidade,” Xefe Departamentu Jestaun Autorizasaun no Introdusaun Merkaduria iha Ministériu Saúde, Teodoro Marçal de Jesus, hateten ba Agência TATOLI iha nia kna’ar fatin Caicoli, kuarta ne’e.
Tuir nian, akordu ho Austrália ne’e fó benifisiu ba Ministériu Saúde liuhusi Diresaun Nasionál Farmasia no Medikamentu hodi foti amostra medikamentu ne’ebé Governu sosa no klínika privadu atu bá teste nia kualidade.
Ai-moruk tipu lima ne’e ida sosa hosi nasaun Indonézia, tipu rua sosa hosi Bangladesh, no rua seluk sosa hosi Índia.
Entretantu, ai-moruk hirak ne’e tipu tolu hosi importadór privadu hanesan ida tipu hosi Klínika Privadu Foho Osan Mean, ida hosi Klínika Istana, ida husi Klínika Moris Foun no tipu rua hosi armazein Servisu Autonómu Medikamentu no Ekipamentu Saúde (SAMES).
Jornalista : Felicidade Ximenes
Editór : Florencio Miranda Ximenes
