DILI, 08 setembru 2022 (TATOLI)– Prezidente Shotokan Karate-do Internasionál Timor-Leste (SKITL), Antonio Carlos de Araujo, informa daudaun halo ona preparasaun téknika hodi organiza no realiza kampionatu nasionál iha loron 16 to’o 18 setembru tinan ne’e.
“Loloos ami nia atividade hala’o iha loron 02 to’o 04 setembr, maibé tanba Jináziu Dili halo hela manutensaun, ami koordena ona ho Sekretáriu Estadu Juventude no Desportu (SEJD) hodi muda ba semana oin, bainhira manutesaun ba Jináziu ne’e ramata,” dehan Antonio ba Agência TATOLI iha Jináziu Dili, kinta ne’e.
Iha kampionatu nasionál ne’e, SKITL sei halo ezame ba nia membru sira hodi sa’e sintu no kampionatu nasionál, partisipante sira sei mai hosi munisipiu 12 inklu Rejiaun Administrativu Espesiál Oé-Cusse no Ambeno (RAEOA).
“Iha lian Japaun nian bolu ezame “dan” indonezia karik bolus “tingkat” hosi kór kafé asistente treinadór sa’e ba metan bolu dan ida, ema na’in 20-resin, dan ida ba dan rua ema hamutuk 50-resin, dan rua ba dan tolu ema na’in-20, dan tolu ba dan haat ema na’in-15 no dan haat ba lima ema na’in-ualu, sira ne’e mak preparadu ona atu tuir ezame,” nia informa.
Ezame ne’e sei partisipa hosi membru ka atleta hosi territóriu nasionál hotu tanba ezame ba Karate-do tuir nia la’ós fasil tanba prepara ona iha tempu ne’ebé naruk.
Nia dehan, SKITL la hetan apoia orsamentu ruma hosi Governu liuluu Sekretáriu Estadu Juventude no Desportu (SEJD) tanba orsamentu ba kampionatu nasionál ne’e sira mak buka no esforsu rasik.
“Ami nia komitementu atu hala’o atividade ho orsamentu tenke buka rasik, ne’ebé ami buka osan rasik mak halo atividade ne’e, orsamentu la apoia hosi Governu, totál orsamentu ne’e internál ami nian ami sei la fó sai ba públiku,” nia relata.
Realiza Kampionatu nasionál, ho objetivu atu buka mós fini atleta sira ne’ebé iha kualidade hodi partisipa iha eventu nasionál no internasionál sira.
Shotokan hanesan organizasaun Karate-do nian ida ne’ebé hamahan-an iha Federasaun Karate-do Timor – Leste nia okos. Enkuantu iha Timor – Leste organizasaun karate-do hamutuk tolu, hanesan hamahan-an hela iha Federasaun Karate-Do Timor-Leste (FKTL) nia mahon mak hanesan Goju Ryu, Kusin Ryu no Shotokan.
Tuir dadus atuál Shotokan nia membru agora iha Dili kuaze ema na’in-2.000 no munisípiu sira hotu hamutuk na’in 500-resin, nune’e totál membru iha territóriu nasionál purvolta na’in-2.500.
Jornalista: Hortencio Sanchez
Editór : Florencio Miranda Ximenes
