DILI, 21 setembru 2022 (TATOLI)—Governu liuhosi reuniaun Konsellu Ministru (KM) ordinária, kuarta ne’e, aprova projetu rezolusaun Governu, ba aprova akordu kooperasaun entre Repúblika Demokrátika Timor-Leste no Repúblika Portugeza iha matéria seguransa interna.
“Projetu Rezolusaun Governu ne’ebé aprezenta husi Vise-Ministru Negósiu Estranjeiru no Kooperasaun, Julião da Silva, ne’e atu garante kooperasaun sira liu-liu ema sira mai kontribui ka serbisu iha Timór iha área seguransa interna nian, liuliu hosi Portugal, sira-nia direitu ita proteje duni no bele halo metin liután kooperasaun iha área ida-ne’e,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu ne’e, iha Palásiu Governu.
Notísia relevante: Governu Timor-Leste no Portugal asina konvensaun ba Seguransa Sosiál
Akordu ne’e asina ona hosi país rua iha loron 27 setembru 2011, ho objetivu atu fó prestasaun mútua no kooperasaun téknika no interkámbiu, liuhosi asaun formasaun profisionál no servisu asesoria iha área seguransa nian.
“Maski akordu ne’e asina ona desde tinan 2011 no implementa ona, maibé seidauk ratifika nune’e submete ba Konsellu Ministru hodi hetan aprovasaun,” nia akresenta.
Jornalista : Antónia Gusmão
Editora : Julia Chatarina
