DILI, 05 outubru 2022 (TATOLI)–Governu liuhosi reuniaun Konsellu Ministru (KM), kuarta ne’e, halo aprovasaun projetu dekretu-lei ba alterasaun dahuluk dekretu-lei númeru 5/2015, loron 22 janeiru, kona-ba estatutu Rejiaun Administrativa Espesiál Oé-cusse Ambeno (RAEOA).
Proposta alterasaun ne’e aprezenta hosi Primeiru-Ministru (PM), Taur Matan Ruak no Prezidente Autoridade RAEOA, Arsénio Paixão Bano.
“Projetu dekretu-lei ne’e ho objetivu atu realiza reajustamentu iha estrutura organizasionál vijente, nune’e mós iha kompeténsia sira ne’ebé rekoñese ba órgaun RAEOA nian,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu.
Notísia relevante: Prezidente Autoridade RAEOA kolleta fore-munggu variedade lakateru iha Lalisuk
Nia dehan, aleinde ne’e, atu haforsa relevánsia rejiaun no atu fó fleksibilidade boot liután ba jestaun inklui promove efisiénsia administrativa hosi estrutura orgánika rejiaun nian, ne’ebé permite ba administrasaun públika rejionál hodi fó métodu ne’ebé efisiente liu ba satisfasaun nesesidade bázika populasaun rejionál hodi bele korrije asimetria rejionál sira.
Nune’e, atu hasoru difikuldade transferénsia ka destakamentu pesoál kualifikadu ba RAEOA, diploma ida-ne’e prevee mós atribuisaun suplementu remuneratóriu ba funsionáriu públiku transferidu sira ka destakadu tuir nesesidade servisu ba rejiaun, devidamente justifika no autoriza hosi Prezidente Autoridade RAEOA.
“Atu garante klareza boot ba enkuadramentu ne’ebé konfere ba ZEESM-TL no sistematiza di’ak ninia dispozisaun normativa sira, introdús kapítulu VI foun ida ho epígrafe Zona Espesiál Ekonomia Merkadu Oé-cusse Ambeno no Ataúru nian,” Portavós Governu tenik.
Jornalista : Antónia Gusmão
Editora : Julia Chatarina
