DILI, 11 outubru 2022 (TATOLI)–Embaixadór Timor-Leste iha Filipina, José Gaspar dos Reis Piedade, informa, timor-oan hamutuk na’in-156 iha Filipina bele partisipa eleisaun parlamentár 2023.
“Daudaun Ministériu Negósiu Estranjeiru no Kooperasaun no Sekretariadu Tékniku Administrasaun Eleitorál halo resensiamentu eleitorál ba komunidade iha ne’ebá, provavelmente depois ekipa ne’e fila, sira relata ba Governu hodi deside atu nune’e iha tinan 2023 timor-oan sira iha Filipina bele tuir eleisaun parlamentár,” Embaixadór hateten hafoin relata serbisu ba Primeiru-Ministru, Taur Matan Ruak, iha rezidénsia ofisiál Primeiru-Ministru, iha Farol, tersa ne’e.
Bainhira halo misaun nu’udar reprezentante Estadu Timor-Leste iha Filipina, desde tinan 2018, rejista estudante timor-oan hamutuk 206.
“Ha’u relata situasaun atuál kona-ba komunidade timor-oan ne’ebé moris iha Filipina, liu-liu estudante sira iha universidade Filipina. Tinan 2018 ha’u to’o iha Filipina, rejista estudante 206, maibé metade hosi ne’e fila ona mai Timór. Atualmente ita rejista sidadaun ne’ebé moris iha Filipina hamutuk 156 inklui padre no madre sira ne’ebé hala’o misaun relijiozu iha Filipina,” nia akresenta.
Notísia relevante: Filipina mantein pozisaun apoia adezaun TL ba ASEAN
Iha biban hanesan, diplomata timor-oan ne’e informa ba Primeiru-Ministru ligadu ho ninia mandatu ne’ebé ramata ona.
“Ha’u-nia misaun hotu ona, kumpre mandatu tinan-haat. Embaixadór foun sei ba fali, Primeiru-Ministru rekomenda katak buat ne’ebé ha’u la halo hotu, embaixadór foun bele kompleta no sira ne’ebé halo ona, bele hadi’a di’ak liután,” nia tenik.
Jornalista : Antónia Gusmão
Editora : Julia Chatarina
