DILI, 13 outubru 2022 (TATOLI)—Primeiru-Ministru (PM), Taur Matan Ruak, hateten, fó fiar ba prosesu investigasaun atu hatene loloos membru Governu balun halo intervensaun ba Servisu Nasionál Intelejénsia (SNI) hanesan mosu iha vídiu balun ne’ebé espalla iha públiku.
Antes mosu vídiu ne’e, SNI foin lalais halo apreensaun ba osan ho montante $130.000 iha aeroportu, ne’ebé deskonfia hosi membru partidu balun atu lori bá rai-li’úr, maibé tanba montante osan ne’e liu $10.000, nune’e ekipa servisu intelejénsia halo apreensaun hodi submete ba justisa.
“Husik ba investigasaun mak bele deside loloos, ida-ne’e mak ha’u sujere. Ha’u prefere investigasaun ba ida-ne’e,” Xefe Governu hateten hafoin ramata reuniaun semanál ho Prezidente Repúblika, iha Palásiu Prezidensiál, Bairru-Pité, kinta ne’e.
Notísia relevante: Membru PN husu prosesa membru Governu interven serbisu investigasaun
Maski nune’e, Xefe Governu nafatin tau konfiansa ba ninia membru Governu hanesan Vise-Ministru Justisa, José Edmundo Caetano no Vise-Ministru Interiór, António Armindo.
“Mantein konfiansa alias prinsípiu prezunsaun inosénsia, ita iha Tribunál atu deside,” nia akresenta.
Aleinde ne’e, PM konfirma katak nia laiha koñesimentu kona-ba karta hosi Vise-Ministru Interiór ne’ebé dirije ba Komandante Jerál Polísia Nasionál Timor-Leste (PNTL), taba ne’e Xefe Governu deside lakohi fó komentáriu.
Jornalista : Antónia Gusmão
Editora : Julia Chatarina
