DILI, 17 outubru 2022 (TATOLI)–Estudante finalista hamutuk 58.132 iha territóriu nasionál preparadu ona atu partisipa ezame nasionál ne’ebé tuir kalendáriu sei realiza iha loron 24 outubru tinan ne’e.
Ministru Edukasaun Juventude no Desportu (MEJD), Armindo Maia, hateten totál estudante 58.132 ne’e kompostu hosi ensinu báziku terseiru siklu, ensinu sekundáriu jerál no privadu, ensinu sekundáriu tékniku vokasionál inklui ensinu rekorrente.
“Ha’u hakarak hateten de’it katak ensinu báziku terseiru siklu na’in 30.836, ensinu sekundáriu jerál no privadu na’in 22.525, ensinu sekundáriu tékniku vokasionál na’in 43.039 no ensinu rekorrente na’in 382”, Armindo Maia ba jornalista sira iha salaun enkontru MEJD Vila Verde, ohin.
Nia haktuir kalendáriu ezame nasionál nian deside ona, sei hahú segunda 24 to’o 26 outubru 2022 no ezame lokál sei hahú entre 27-29 outubru 2022. Matéria pontu ezame nasionál rasik hetan preparasaun hosi ministériu rasik ne’ebé responsavel hosi Unidade Kurríkulu Nasionál no ezame lokál hetan preparasaun hosi eskola ida-idak.
Membru governu ne’e rasik garante katak ezame nasionál ne’e hetan ona preparasaun di’ak no tuir planu Ministériu Edukasaun sei halo abertura ba distribuisaun pontu ezame nasionál tuir planu sei realiza iha loron 21 outubru 2022 iha sentru impresaun Komoro. Atu nune’e bele halo ona distribuisaun ba kada eskola sira iha munisípiu sira.
Enkuantu fasilidade atu apoiu estudante sira iha ezame nasionál no ezame lokál ne’e sufisiente ona, tanba ministériu mós halo ona distribuisaun karteira eskolár ba eskola sira ne’ebé menus mobiliáriu atu apoiu estudante sira iha ezame nia laran.
Notísia relevante: Finalista 81 hosi eskola haat iha Dili la partisipa ezame nasionál
Jornalista : Tomé Amado
Editora : Rita Almeida
