OÉ-CUSSE, 19 outubru 2022 (TATOLI) – Prezidente Autoridade Rejiaun Administrativa Espesiál O’e-Cusse Ambeno (RAEOA), kuarta ne’e halo abertura distribuisaun xapa- matríkula ho tipu orijinál ba motorista públiku no privada sira iha rejiaun ne’e.
“Xapa-matríkula orijinál primeira-vez ita lansa iha Oé-Cusse, tanba antes ne’e maioria uza provizóriu de’it, ida-ne’e orgullu boot ida tanba ita tenke regula ema mai hosi li’ur, uma-na’in tenke regula-aan uluk. Ha’u hanoin ita hotu-hotu tenke halo tuir,” Arsénio Paixão Bano, ko’alia iha abertura distribuisaun xapa-matríkula realiza iha Departamentu Rejionál Transporte Terrestre (DRTT), Oé-Cusse.
Nune’e nia husu ba motorista sira, komposta hosi transporte públiku no privada komesa hosi motorizada, tum-tum, no karreta, presiza uza tanba iha futuru regulamentu teknolojia sei iha mudansa liuhosi instalasaun CCTV atu kontrola sirkulasaun transporte iha sidade laran.
“Ha’u fiar ita hotu sei kumpre, ohin ne’e ita abertura no balu sei simu kontinua ba oin, ita tenke halo hotu depois ita-nia rai Oé-Cusse labale iha tán transporte ilegál, tanba ema hotu-hotu hakarak mai vizita Oé-Cusse, ita-nia transporte sira mós tenke kumpre rekizitu transporte nian,” nia katak.
Diretór Rejionál Infraestrura, Candido dos Reis Amaral, agradese ba empreza fornesedór, tanba durante prodús xapa-matríkula ho tipu orijinál kumpre duni dokumentu kontratu ne’ebé autoridade RAEOA propoin.
Tan ne’e nia reprezenta DRTT Oé-Cusse, hakarak fó hanoin nafatin ba povu Oé-Cusse, liuliu uza transporte ba nesesidade, presiza trata ona, nune’e bele kumpre regulamentu transporte nian.
Entretantu, xapa-matríkula originál ne’e fornese hosi empreza lokál, Taneseb Maesmat, Unipesoál, Lda, ho valór kontratu $22,600.00, hodi prodús xapa-matríkula originál hamutuk 3.500, komposta hosi transporte públiku no privada ho tipu motorizada, tum-tum, no karreta.
Nune’e mós valór orsamentu ne’e Autoridade RAEOA prevee hosi Orsamentu Jerál Estadu (OJE) 2022 nian ho durasaun kontratu loron 120.
Jornalista : Abílio Elo Nini
Editór : Evaristo Soares Martins
