DILI, 27 outubru 2022 (TATOLI)–Diretór Servisu Edukasaun munisípiu Viqueque, Emídio Amaral, informa, estudante finalista munisípiu Viqueque na’in-11 maka la partisipa iha ezame nasionál períodu 2022.
“Hosi estudante 11, ida maka hetan kazu ne’ebé hatan hela iha Tribunál no nia sei tuir fali ezame nasionál iha semana oin. Estudante ne’ebé auzénsia, hosi ensinu báziku na’in-hitu, ensinu sekundáriu jerál iha tolu no sekundáriu tékniku vokasionál hamutuk ida,” Diretór hateten ba Agência Tatoli, via telefónika, kinta ne’e.
Tuir Diretór, estudante hosi ensinu báziku na’in-hitu ne’e antes sai ona hosi eskola, maibé molok ne’e sira-nia naran haruka ona bá nasionál, nune’e iha ezame nasionál sira-nia naran iha, maibé la tuir ezame.
Notísia relevante: Ezame nasionál: estudante EBC Maucatar la seguru uza kadeira masa sai meza
Progresu ezame nasionál ba tinan ne’e la’o di’ak no ekipa edukasaun horiseik (26/10) lorokraik ba rekolla fali ona pontu ezame iha postu lima.
“Ha’u haree ezame nasionál iha tinan ne’e la’o ho di’ak no ami-nia ekipa horiseik rekolla fali ona pontu ezame nasionál, agora ami halo verifikasaun no aban pontu ezame sira-ne’e sei lori bá nasionál hodi halo koresaun,” nia tenik.
Nia dehan, rezultadu ezame nasionál munisípiu Viqueque ohin hahú halo verikasaun no rezultadu ezame nasioná sei fó sai iha inísiu tinan 2023.
Tuir dadus, estudante finalista antes ne’e totál hamutuk 3.296, kompostu hosi Eskola Ensinu Baziku Sentrál (EBC, sigla portugés) 1.897, Eskola Ensinu Sekundáriu Jerál (ESJ) 1.306, no Eskola Ensinu Sekundáriu Tékniku Vokasionál (ESTV) 96.
Kompara ho dadus estudante finalista hosi tinan 2021 hamutuk 4.000 ne’ebé mak partisipa ezame nasionál, enkuantu auzente laiha.
Jornalista : Vitorino Lopes da Costa
Editora : Julia Chatarina
