Poezia reflesaun ba loron 12 novembru
Hosi:
Soares Pedro
Iha fatin semitériu ida ne’e….
Iha joven ida hamriik
Kontra anin no laloran
kolonializmu ne’ebé
mai destroe batalla
Maubere oan asu’ain
Nia knuuk!
Iha fatin semitériu ida ne’e…
Iha joven ida hamriik
See hirus matan ba kilat tutun kolonializmu.
Liman ne’ebé kaer la to’o
Ain ne’ebé hakat la to’o
Hodi hakilar ho lian maka’as ba mundu
“Mate ka moris ukun rasik aan”
Iha fatin semitériu ida ne’e…
Iha joven ida hamriik
No nafatin hodi dehan….
Ba Ó, ha’u ne’e see?
“Nai” fó resposta:
“Ó mak ha’u nia istória ne’ebé sei la mohu”!
Tanba,
Ó isin bele lakon Ó klamar sei morin lemorai!
Ó juventude loriku asu’ain!
Ó povu maubere nia oan!
Ó mak eroi, Ó ha’u nia eroi!!!
