DILI, 12 novembru 2022 (TATOLI)—Vise-Ministru Administrasaun Estatál (MAE), Lino Torrezão de Jesus, relata, preparasaun loron proklamasaun independénsia Timor-Leste ba dala-47 (28/11/1975-28/11/2022), ne’ebé sei realiza iha Manatuto, atinje ona 60%.
“Komisaun organizadora ho empreza vensedór hahú sukat no monta ona besi rin bandeira nian, aterru rai no preparasaun seluk. Ami espera katak iha loron 18 novembru, empreza bele entrega ona ba komisaun organizadora nune’e halo prepasaun ba atividade seluk,” Vise-MAE hateten ba Agência Tatoli, sesta (11/11) iha Comoro.
Daudaun iha hela faze serbisu fíziku, ne’ebé empreza aterru hela fatin serimónia isar bandeira no fatin ba bainaka importante sira.
Notísia relevante: Preparasaun fatin ba selebrasaun loron proklamasaun independénsia iha Manatuto atinje 25%
Aleinde ne’e, ekipa téknika liuhosi seksaun sira, iha segunda bele hahú monta ona tenda tradisionál inklui tenda sira seluk.
Governu prevee ona $400.000 ba selebrasaun loron proklamasaun independénsia iha loron 28 novembru iha Manatuto.
Tema selebrasaun loron proklamasaun independénsia tinan ne’e maka: ‘Mai ita hamutuk kontinua luta ba povu nia moris di’ak.’
Jornalista : Osória Marques
Editora : Julia Chatarina
