iklan

NASIONÁL, MANATUTO

Preparasaun fatin ba selebrasaun loron proklamasaun independénsia iha Manatuto atinje 25%

Preparasaun fatin ba selebrasaun loron proklamasaun independénsia iha Manatuto atinje 25%

Diretór Administrasaun Finansa iha MAE, Agostinho da Costa. Imajen Tatoli/Natalino Belo.

DILI, 04 novembru 2022 (TATOLI)—Diretór Jerál Administrasaun no Finansa iha Ministériu Administrasaun Estatál (MAE), Agostinho da Costa, informa preparasaun fatin ba selebrasaun loron proklamasaun independénsia ba dala-47 ne’ebé tuir planu sei selebra iha munisípiu Manatuto ne’e atinje ona 25%.

Notísia Relevante: Governu prevee $400.000 ba selebrasaun loron proklamasaun independénsia

Maske foin atinje 25% maibé komisaun hamutuk ho kompañia esforsu atu bele aselera no finaliza tiha fatin atu selebra loron importante ne’e, nune’e bele realiza serimónia ne’e ho di’ak.

“Agora kompañia esforsu hela atu aumenta tan karreta boot 10 hodi ateru rai iha fatin ne’e, maibé espera to’o loron 07 novembru 2022 bele iha ona progresu, tanba hela ateru de’it ona,” Diretór ne’e hateten liuhosi WhatsApp, sesta ne’e.

Nia hateten, agora iha hela faze servisu fíziku, kompañia ateru hela fatin serimónia isar bandeira nian no fatin ba bainaka Verry Verry Important Person (VVIP).

Aleinde ateru rai, ohin kompañia mós hahú metru ona bandeira riin hodi monta iha fatin refere, nune’e segunda (07/11), seksaun sira bele hahú monta ona tenda tradisionál no mós tenda sira seluk, no tema ba loron proklamasaun independénsia ba dala-47 ne’e mak “Mai ita luta ba povu nia moris”.

Antes ne’e, Ministru Administrasaun Estatál (MAE), Miguel Pereira de Carvalho, hateten ministériu prevee $400.000 ba selebrasaun loron proklamasaun independénsia loron 28 novembru iha Manatuto.

Iha komemorasaun loron independénsia ne’e, sei realiza mós atividade desportiva, semináriu no mós realiza feira iha ne’ebá no isar bandeira.

Jornalista : Osoria Marques

Editór       : Cancio Ximenes

 

iklan
iklan

Leave a Reply

iklan
error: Content is protected !!