BAUCAU, 09 dezembru 2022 (TATOLI)— Primeiru Ministru (PM), Taur Matan Ruak, sesta (09/12) ne’e hatur fatuk dahuluk ba kontruksaun estrada liga hosi Quelicai, Munisipiu Baucau to’o iha suku Nahareka, munisípiu Viqueque.
Serimonia hatur fatuk dahuluk halao iha estrada Uaiaca, Quelicai-Baucau, sesta ne’e. Iha Serimónia ne’e partisipa mos hosi membru VIII , deputadu, autoridade lokál no komunidade sira.
Administradór munisípiu Viqueque, Januario Soares ‘Bolly’, hafoin serimonia lansamentu ne’e, husu abitantente hosi Postu Administrativu Ossu, munisípiu Viqueque atu labele impede konstrusaun estrada liga hosi Quelicai to’o iha suku Nahareka.
“Dalan loke hanesan ne’e ema sei impede tanba estraga ai-horis sira-ne’e no povu nia raiu. Maibé ida-ne’e programa governu nian ita tenke kontribui tanba dalan ne’ebé loke ne’e sei fó benifísiu ba ita povu. Tan ne’e ha’u husu komunidade sira labele halo impedimentu ruma ba konstrusaun estrada ne’ebé atu liga ba Ossu”, Januario Soares “Bolly”, hateten ba jornalista sira, hafoin partisipa serimónia lansamentu estrada Quelicai-Ossu, iha Uaiaca, Quelicai, sesta ne’e.
Autoridade Viqueque hatutan, Governu atu kria kondisaun ba povu hodi bele asesu estrada tanba ne’e sidadaun sira tenke kolabora no koopera ba programa dezenvolvimentu sira-ne’e.
“Konstrusaun estrada ne’e hahú Quelicai sei to’o iha Nahareka, depois mak halo kontinuasaun”, nia haktuir.
Iha fatin hanesan Adiministradór Postu Ossu, Sebestião Freitas Pires, haktuir ba konstrusaun estrada ida-ne’e sei laiha komunidade ida maka atu impede projetu estrada Uaiaca to’o Nahareka ne’ebe sai movitasaun ba komunidade tanba primeiru hetan dalan hanesan ne’e.
“Ha’u hanoin ba konstrusaun estrada laiha ema ida maka impede. Se karik ha’u-nia komunidade Uaibobo no Nahareka maka halo impedementu ruma ha’u prontu ko’alia ho sira tanba projetu ida-ne’e laiha ema ida maka impede”, nia subliña.
Nia dehan, dalan ne’e sei fó benifísia ba abitante sira Nahareka, Uaibobo no Builo sira ne’ebe bele lori produtu liuhosi dalan ida-ne’e besik liu Baucau.
“Ita-nia komunidade sira bele lori sira-nia produtu fasil asesu ba merkadu hodi hetan rendimentu ruma”, nia realsa.
Tuir padraun Estrada Municipiu Postu, Quelecai (Baucau) – Nahareka (Ossu -Viqueque) bele mos kontribui ba dezenvolvimentu socio-ekonomiku iha Municipiu Baucau no Viqueque.
Projeitu kontruksaun Estrada ne’e ho distancia 22.70 kilometrus no nia luan metro hitu (7), kompostu husi metro haat (4) ba aspal, alargamentu metru ida (1) no ombru metro rua (2).
Servisu ne’e sei halao hosi PT. Konsep Perunding Sdn ghd (Malaysia), ho durasaun servisu fulan 18 nomos ninia orsamentu hamutuk $452,122.00.
Jornalista : Vitorino Lopes da Costa
Editóra : Armandina Moniz
