VIQUEQUE, 11 dezembru 2022 (TATOLI)—Adiministradór postu administrativu Viqueque Vila, munisípiu Viqueque, Duarte Brandão Soares, informa implementasaun programa mão de obra postu adiministrativu (PMOPA) iha Viqueque Vila ne’ebé envolve traballadór 1.220 ne’e finaliza ona iha fulan-novembru.
“Implementasaun PMOPA iha postu Viqueque Vila finaliza ona iha fulan kotuk. Hosi programa ida-ne’e ami konsege envolve ema totál hamutuk 1.220 hosi suku 10 iha postu Viqueque vila,” Autoridade postu Viqueque Vila ne’e hateten ba Agência TATOLI, domingu ne’e.
Implementasaun PMOPA ne’e, traballadór sira konsege hamoos baleta sira maibé iha tempu bailoron no agora udan monu-rai ne’e duut sira komesa moris fila-fali no presiza hamoos tán liuhosi PMOPA.
“Orsamentu ita gastu iha tempu bailoron nian. Entaun udan agora tun ne’e, ita haree duut mak moris fila-fali. Tempu uluk merkadu Olobai foer mak nakonu, maibé implementa PMOPA agora merkadu sai moos fila ona,” nia dehan.
Implementasaun PMOPA mak hanesan hamoos baleta, halo lutu haleu sede suku, taka dalan kuak, kuda ai-horis ba bee-matan sira ho totál atividade 61, no programa sira-ne’e implementa iha suku 10u iha postu Viqueque vila.
“Programa ida-ne’e implementa fó duni benifísiu ba ita-nia abitante sira nomós ba ema ho defisiénsia sira mós envolve serbisu hotu. Durante implementasaun laiha traballadór ida mak halo reklamasaun ruma,” nia hateten.
Tuir dadus traballadór PMOPA kada suku, hosi suku Uma Ki’ik traballadór hamutuk na’in-120, Maluro hamutuk na’in-100, Luka hamutuk na’in-100, Uma Uain Leten hamutuk
na’in-140, Caraubalu hamutuk na’in-140, Bibileo hamutuk na’in-100, Bahalara Uain hamutuk na’in-100, Fatudere hamutuk na’in-100, Uma Uain Craic hamutuk na’in-160 no suku Uaimori hamutuk na’in-160, nune’e totál hosi suku 10 hamutuk na’in-1.220 no hosi númeru ne’e ema ho defisiénsia totál hamutuk na’in-22 ne’ebé kompostu hosi feto na’in-11 no mane na’in-11.
Enkuantu alokasaun orsamentu ba PMOPA ho totál hamutuk $131.641.33 ne’ebé aloka ba operasionál $6,571, kombustível $124.86 no ba a atividade 61.
Jornalista : Vitorino Lopes da Costa
Editór : Cancio Ximenes
