BOBONARO, 27 dezembru 2022 (TATOLI) – Xefe Suku Holsa hosi Postu Administrativu Maliana, Munisípiu Bobonaro, António Santa Cruz, relata iha abitante hamutuk na’in 1.805 maka naran laiha lista atu simu sasan Cesta Bazíka hosi Governu.
António friza tuir dadus ne’ebé iha, komunidade iha Suku Holsa hosi aldeia neen hamutuk na’in 8.920 mak sai benifísiariu ba programa ne’e.
Notísia relevante:MTKI konklui distribuisaun produtu Cesta Bázika iha suku Lahomea Bobonaro
“Ami simu lista hosi Ministériu Turizmu Komérisu no Indústria ne´ebé entrega ba empresa, ha´u nia suku sei iha 1.805 abitante mak naran la mai, sira balu rejistu iha 2019 to’o data markadu 28 fevreiru 2022 iha fulan marsu tesik mai ami seidauk sura, maibé sei iha dalan ne’ebé Governu ho empreza fó mak tenke halo reklamasaun atu nune’e bele rezolve”, hateten nia ba Jornalista Tatoli, iha kna’ar fatin, tersa ne’e.
Maibé lideransa komunitária ne´e lamenta tebes ho sistema ne’ebé iha tamba tuir informasaun ne´ebé iha katak benifísiáriu sira naran tama iha lista distribuisaun Cesta Bazíka bazea ba dadus Sensus 2015.
Ho nune’e, Xefe Suku ne’e konsidera lista hosi nasionál ne’e la justu tamba hahú hosi 2019, xefe família aumenta, inklui ema balun muda hosi suku ida ba suku seluk mak barak.
Relasiona ho kestaun ne’e, Xefe Suku Holsa rekomanda ba ministériu kompetente atu kria sistema online, nune’e bele fasilita Diresaun Nasionál Apoiu Administrasaun Suku (DNAAS) sinkroniza dadus.
“Ita uza sistema online ne’e sei ajuda tebes data base ne’ebé hosi suku fó ba Ministeriu Estatál atu nune’e ita labele dun malu iha tempu ne’ebé mak tuir mai ita fahe buat ruma ba komunidade”, katak.
Líder autoriedade lokál ne’e haktuir iha 22 to’o 23 fulan dezembru empreza distributór Gez Unipesoál Lda konsege halo distribuisaun produtu Cesta Bazíka ba comunidade, Aldeia Solugolo,maibé númeru benefisiáriu na’in 2.000-resin kedas nune’e labele ditribui hotu tamba kona loron boot natal.
Enkauntu tuir oráriu ne’ebé MTCI fó prosesu distribuisaun sei kontinua fali ohin (27/12), maibé la konsege tamba loron boot Natál no atu tama tinan foun 2023 trabaladór Empreza responsavél sira feriadu hotu.
“Ha´u simu imformasaun via-telefone hosi Diretór Empreza katak ninia funsionariu la tama servisu ne’ebé labele mobiliza sasan mai entaun muda fali ba janeiru 2023 ba abitante aldeia Lima, inklui aldeia Sologu balu”, dehan.
Xefe suku António observa katak durante prosesu distribuisaun la´o produtu ne’ebé empresa fahe tama hotu kritériu tamba item ne’ebé Governu fó sai kompletu hotu kedas.
“Komunidade sira lamenta oituan ho naan ne’ebé maka empreza fahe maibé iha tempu ne’ebá bele rezolve kedas situasaun no kontinua fahe maske agora seidauk hotu”, revela.
Iha fatin seluk, abitante Aldeia Bilicou,Lucia Soares, sente kontente no agardese ba programa Governu, maske hein kleur tamba iha Munisípiu Bobonaro, komunidade iha suku seluk barak mak simu hotu ona.
“Ami espera empreza bele fahe sasan ne’e tuir buat ne’ebé sira promote ona, atu nune’e ami bele hetan ami nia direitu ne’e tamba Cesta Bazíka ne’e maske oituan de´it maibé bele ajuda ami han iha loron ka rua hanesan ne’e”, refere.
Enterantu, tuir dadus monografia 2021, xefe família iha Suku Holsa hamutuk 1,800-resin mai hosi aldeia mak hanesan, Aldeia Solugolo, Oplegul, Loloa, Sekar, Bilibou no Aldeia Taz.
Notísia relevante:Abitante Ritabou kestiona kompañia kahur produtu ‘fuhuk’ iha Cesta Bázika
Jornalista: Sérgio da Cruz
Editór: Zezito Silva
