OÉ-CUSSE, 28 dezembru 2022 (TATOLI)–Komunidade iha suku Costa sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), hanesan Aleixo Abi, Agostinho Elo no Merita Oqui agradese ba VIII Governu Konstitusionál tanba oferese subsidiu kada uma-kain ho montante $200, hodi festeza loron natál 2022 no tinan foun 2023.
“Ami agradese tebes ba VIII Governu, ha’u haree ha’u-nia komunidade sira kontenti tebes ho subsidiu ne’e, bele festa natál no tinan foun hamutuk ho família ida-idak,” Xefe suku Costa, Aleixo Abi, espresa nia sentimentu iha sede suku Costa bairru Masin Oé-Cusse, kuarta ne’e.
Nu’udar autoridade komunitária, agradese mós ba komunidade sira maske naran balu la sai hodi hetan subsidiu ne’e maibé ho laran di’ak liuhosi maneira kooperasaun no konfirmasaun, to’o pagamentu ne’e la’o ho susesu.
Nune’e hanesan xefe suku espera Governu bele konsidera ba lista reklamante sira, tanba iha uma-kain balu, iha tinan rua kotuk konsege simu direitu ba cesta bázika no subsídiu COVID-19 $200, maibé ikus ne’e sira nia naran la sai, ne’ebé ita husu bainhira pagamentu termina bele responde netik sira-ne’ebé la konsege simu.
Sentimentu hanesan hato’o hosi Agostinho Elo, konsidera programa subsidiu $200 bele sustenta ona nesesidade família ida-idak, liu-liu ba kbiit laek sira.
“Ha’u hanoin iha futuru bele halo evaluasaun liu-liu sira-ne’ebé funsionáriu, di’akliu fokuliu ba ema sira-ne’ebé la hetan servisu merese duni atu hetan, maibé ba funsionáriu públiku sira iha ona salariu-13 entaun la persiza hetan subsídiu fim do ano,” nia sujere.
Tuir Agostinho Elo nia observasaun, desde pagamentu subsidiu $200 ne’e akontese, komunidade iha movimentasaun maka’as ba merkadu no kioske, ne’e signifika katak osan komesa sirkula ona, entaun motorista, faan modo no bua-malus sira mós hetan ona osan.
Maria Oqui mos hatutan: “Ami kontenti apoiu Governu ida-ne’e, tanba Governu lahaluha ami iha Oé-Cusse, ami simu ona apoiu ida-ne’e ba ami bele uza ba ami nia nesesidade família uma laran, ami husu nafatin iha futuru bele implementa nafatin,” nia orgullu.
Entretantu, bazea ba dekretu-lei númeru 37/2022, loron 25 maiu, artigu 2, kona-bá benefisiáriu sira ba subsidiu ne’e hanesan uma-kain sira-ne’ebé rejistadu ona iha livru rejistu uma-kain iha suku iha territóriu nasionál tuir termu previstu iha diploma ministeriál númeru 47/2017, 23 agostu.
Ba efeitu númeru anteriór, konsidera katak hirak ne’ebé rejistadu ona iha livru rejistu uma-kain ne’e hanesan sira-ne’ebé mak rejistu ona uma-kain no rejistu válidu to’o 28 agostu 2022.
Notísia relevante:Uma-kain 21.383 iha Oé-Cusse sei simu subsidiu $200
Jornalista : Abílio Elo Nini
Editora : Rita Almeida
