DILI, 28 dezembru 2022 (TATOLI)—Governu liuhosi reuniaun Konsellu Ministru (KM), kuarta ne’e, aprova proposta dekretu-lei kona-ba regulamentu medalla militár no komemorativa defeza ba FALINTIL Forsa Defeza Timor-Leste (F-FDTL), ne’ebé aprezenta hosi Ministru Defeza, Filomeno da Paixão de Jesus.
“Diploma ne’e ho objetivu atu kria no regula kondisaun atribuisaun modalidade medalla militár ne’ebé destina atu fó prémiu ba servisu ho valór a’as tebes, ne’ebé hala’o ba F-FDTL no nasaun, inklui halo distinsaun ba virtude importante ne’ebé hatudu iha servisu militár F-FDTL,” Ministru Prezidénsia Konsellu Ministru, Fidelis Manuel Leite Mangalhães, hateten hafoin reuniaun ezekutivu ba dala-ikus nian ba tinan 2022, ne’ebé prezide hosi Vise Primeiru-Ministru no Ministra Solidaridade Sosiál no Inkluzaun, Armanda Berta dos Santos, iha Palásiu Governu.
Notísia relevante: Hetan medalla méritu, Jenerál Andika agradese ba Estadu Timor-Leste
Tuir governate ne’e, medalla militár ne’e bele atribui ba militár estranjeiru no sivil nasionál ka estranjeiru, iha situasaun ne’ebé prevee iha regulamentu ida-ne’e.
“Medalla militár ne’e inklui modalidade sira hanesan valór militár, krús guerra, servisu distintu sira, méritu militár, F-FDTL, komportamentu ezemplár, komemorativa kampaña, no komemorativa komisaun servisu espesiál sira,” nia akresenta.
Aleinde ne’e, modalidade medalla sira hanesan valór militár sei fó ba militár sira ne’ebé prinse ona servisu iha F-FDTL ho forma di’ak durante tinan 15 ka 20 bainhira lei ne’e tama vigór, kualifikadu sira bele hetan medalla valór militár, maibé desizaun ne’e sei halo ka tetu tuir rekezitu sira hotu mak foin atribui.
“Ba medalla ho valór grau krúz sei fó ba ema hirak ne’ebé tiru malu iha batalla, ezemplu F-FDTL halo operasaun ruma iha nasaun sira seluk halo asaun aktu hatudu aten brani hodi fó sira-nia an salva nia maluk sira. Ida-ne’e sei kualifikadu, maibé atu dehan de’it katak medalla grau sira ne’ebé iha sei atribui tuir kontéstu espesífiku mak fó ba sira ne’ebé merese atu hetan medalla sira ne’e tanba lei no sistema iha ona,” Ministru tenik.
Jornalista : Arminda Fonseca
Editora : Julia Chatarina
