DILI, 04 janeiru 2023 (TATOLI)—Prezidente Autoridade Munisípiu Dili (PAM), Guilhermina Filomena Saldanha Ribeiro, hateten fulan ida-rua tan semitériu públiku Becuse laiha ona espasu atu hakoi mate maibé ida-ne’e sei hein desizaun hosi Governu atu muda ba semitériu públiku foun iha Metinaro.
Notísia Relevante: Semitériu Because nakonu sei utiliza semitériu públiku foun iha Metinaro
“Bainhira mak atu hakoi iha Metinaro ne’e , ami hein de’it desizaun hosi Governu dekreta no taka Becuse no loke fali Metinaro. Mezmu iha Metinaro entermu infraestrutura seidauk hahú maibé ita haree parte ida ita bele haloot mate iha ne’ebá ona maibé hein desizaun hosi Governu,” PAM Dili ne’e hateten ba jornalista sira, hafoin partisipa serimónia entrega servisu hosi Komandante PNTL sesante Munisípiu Dili, Superintendente Xefe Henrique da Costa ba Komandante Munisípiu Dili, Superintendente Xefe Natércia Martins, iha salaun Komandu PNTL Caicoli, kuarta ne’e.
Progresu semitériu Metinaro nia fizikamente iha hela prosesu fundu infraestrutura nian tanba sira mak halo dezeñu, nune’e hein de’it mesmu Autoridade Munisípiu Dili mak nain.
Antes Ministru Administrasaun Estatál (MAE), Miguel Pereira de Carvalho, hateten semetériu Becusse besik nakonu ka nakonu mak sei kontinua utiliza hodi hakoi mate iha simetériu públiku foun iha postu adminiatrativu Metinaro, munisípiu Dili tanba simetériu refere preparadu ona.
“Simetériu Becuse kuandu nakonu ona, bele hakoi iha Metinaro ne’ebá tanba ne’ebá Institutu Jestaun Ekipamentu halo tetuk ona no preparadu ona atu hakoi mate-isin sira,” Governante ne’e hateten.
Governante ne’e hatutan, dalan ka estrada ba semitériu foun ne’e di’ak hotu ona inklui kapela no daudaun ne’e IGE kontinua halo konstrusaun moru hale’u simetériu refere.
Prosesu muda semitériu tuan ba semitériu foun iha Metinaro ne’e iha opsaun rua, ida mak sei hein dekretu Governo no diploma ministeriál.
Notísia Relevante: Orsamentu limitadu, AMD seidauk konstrui moru ba semitériu públiku Metinaro
Jornalista : Osória Marques
Editór : Cancio Ximenes
