OÉ-CUSSE, 05 janeiru 2023 (TATOLI) – Iha janeiru to’o novembru 2022, Departamentu Rejionál Transporte Terrestre no Komunikasaun (DRTT), Rejiaun Administrativa Espesiál Oé-Cusse Ambeno (RAEOA), rekolla reseita $89,228.00 ba kofre estadu liuhosi trata dokumentu transporte sira iha rejiaun ne’e.
“Reseita ne’ebé servisu DRTT rekolla ne’e durante fulan 11, hosi janeiru to’o novembru 2022 ne’e hamutuk $89,228.00, ne’e seidauk inklui dezembru tanba resibu sei iha hela banku,” Xefe DRTT Oé-Cusse, Silvestre Sila Teme, ba Agência Tatali iha Oé-Cusse, kinta ne’e.
Notísia relevante: Silvestre Sila nomeadu nu’udar Xefe DRTT Oé-Cusse
Nia informa, reseita sira-ne’e maihosi trada dokumentu transporte karreta no motorizada, karta kondusaun, rejista xapa-matríkula no troka naran ba motorizada no karreta, hosi atividade sira-ne’e maka konsege kontribui reseita maka’as ba kofre Estadu.
“Reseita tinan ne’e boot kompara ho tinan 2021 tanba iha situasaun COVID-19, afeta ba atividade hotu paradu maka taxa mós ba Estadu mós tún,” nia afirma.
Durante ne’e DRTT iha kooperasaun di’ak ho serbisu unidade tránzitu Oé-Cusse, liuliu kona-bá infrasaun nian bainhira halo pasa-revista ba dokumentu transporte nian.
Notísia relevante:DRTT Oé-Cusse hatama reseita ba kofre Estadu rihun $11-resin
Jornalista : Abílio Elo Nini
Editór : Evaristo Soares Martins
